ئیبراهیم شه‌ره‌فانى، په‌ڕله‌مانتارێ كوردستانێ ژ فراكسیۆنا پارتى گۆت: پێنگاڤێن باش بۆ پێكئینانا حكومه‌تا هه‌رێما كوردستانێ هاتینه هاڤێتن و رێككه‌فتن ل سه‌ر سیاسه‌تا گشتى ئانكو به‌رنامه‌یێ حكومه‌تێ هاتییه‌كرن و ب پێنگاڤه‌كا گرنگ ناڤكر و دیاركر، چه‌ندین كۆمبوون ل دۆر دابه‌شكرنا پۆستان ژى هاتینه‌كرن.
هه‌روه‌سا ئاشكراكر، د دوماهى كۆمبوون دا كو د ناڤبه‌را شاندا پارتى ب سه‌رۆكایه‌تییا مه‌سروور بارزانى و بافل تاله‌بانى، سه‌رۆكێ شاندا ئێكه‌تیێ ل دۆكان چار وه‌زاره‌ت ئێكلا بووینه و گۆت: وه‌زاره‌تا دارایى و پێشمه‌رگه بۆ ئێكه‌تیێ نه و هه‌ر ئێك وه‌زاره‌تا سامانێن سروشتى و ناڤخۆ ژى بۆ پارتى دیمۆكراتى كوردستانن.
شه‌ره‌فانى ئاشكراكر، د كۆمبوونا دوهى دا خالێن گه‌وهه‌رى هه‌بوون و گركا مه‌زن كو ئه‌ڤ هه‌ر چار وه‌زاره‌ته بوون ئیكلا بوون و هاته ڤه‌كرن.
ل دۆر كۆمبوونێن په‌ڕله‌مانێ كوردستانێ ژى پێشبینى كر ل دوماهییا مه‌ها پێنج كۆمبوونا په‌ڕله‌مانى بهێته‌كرن و پێنگاڤێن پێكئینانا حكومه‌تا هه‌رێمێ بهێنه هاڤێتن.