جڤاتا ئاساییشا هه‌رێما كوردستانێ هێرشێن تیرۆرستى یێن ب درۆنان ل سه‌ر هێزێن پێشمه‌رگه‌ى ل سنۆرێ پارێزگه‌ها دهۆكێ شه‌رمزاركرن و راگه‌هاند، بۆ هه‌رهێرشه‌كێ پێشمه‌رگه ئاماده‌یه.
ده‌قێ راگه‌هاندنا جڤاتا ئاساییشا هه‌رێمێ:
دوهى و ئه‌ڤرۆ سپێدێ گرۆپه‌كێ تیرۆرستى د دو هێرشێن جودا دا ب درۆنان بنگه‌هێن هێزین پێشمه‌رگه‌ى ل سنۆرێ پارێزگه‌ها دهۆكێ كرییه ئارمانج و د ئه‌نجام دا پینج پێشمه‌رگه بریندار بووینه.
ره‌وشا بریندارانباشه و پێشمه‌رگه ئاماده‌نه ب ئیراده‌یه‌كا پۆلاینى به‌رسینگێ هه‌رجۆره پیلان و هێرشه‌كا نه‌حه‌زان بگرن.
د ده‌مه‌كى دا كو پرۆسێسا ئاشتیێ ل باكۆر، كۆنفرانسێئێكه‌تیا ئالیێن كوردستانى ل رۆژئاڤا و پرۆسێسا پێكئینانا كابینه‌یا نوو یا حكومه‌تا هه‌رێما كوردستانێ چ نه‌مایه بجهـ بهێت، هنده‌ك ئالى و گرۆپ بزاڤێ دكه‌ن پرۆسه‌یا ئاشتیێ و سه‌قامگێریێ ل ده‌ڤه‌رێ تێك بده‌ن.
ئه‌م وه‌ك جڤاتا ئاساییشا هه‌رێما كوردستانێ زێده‌بارى شه‌رمزراكرنا وان هێرشێن تیرۆرستى، هۆشداریێ دده‌ینه هه‌موو وان گرۆپ و ئالیێن ئاساییشا هه‌رێما كوردستانێ تێك دده‌ن.
هێزێن پێشمه‌رگه‌ى و هێزێن ئاساییشا ناڤخۆئاماده‌نه بۆ هه‌ر كارڤه‌دانه‌كا گونجایى به‌رامبه‌ر هه‌ر هێرشه‌كا تێكده‌رانه.
جڤاتا ئاساییشا هه‌رێما كوردستانێ
29-4-2025