سەرۆکێ هەرێما کوردستانێ د پەیامەکێ دا رۆژا جیهانی یا ژنان پیرۆز کر و راگەهاند: هیڤییا پێشکەفتن و سەرکەفتنا پتر بۆ هەمی ژنێن کوردستان و ئیراقێ و جیهانێ د بزاڤ و خەباتا وان دا بۆ بجههاتنا دادپەروەری و ئێکسانییێ دخوازم.
سەرۆک نێچیرڤان بارزانی سەرۆکێ هەرێما کوردستانێ د تۆرا جڤاکی یا ئێکسێ دا ب هەلکەفتا رۆژا جیهانی یا ژنان پەیامەک بەلاڤکر و راگەهاند: هەمی پشتەڤانییا خۆ بۆ بەردەوامییا رۆلێ [ژنان] یێ کاریگەر د بنیاتدانانا جڤاکەکا ئازادتر، دادپەروەرتر و پێشکەفتیتر دا دووپات دکەم.
سەرۆکی هەروەسا نڤییسە: ب درێژاهییا دیرۆکێ ژنێ ل کوردستانێ، د مەیدانا خەباتا سیاسی و بەرهەنگاربوونێ و هەمی بیاڤێن دی یێن ژیانێ دا، بەرهەڤی، زیرەکی و خۆراگرییا خۆ سەلماندییە. ئەو پشکەکا نەڤەقەتیایی بوویە ژ کاروانێ ئازادییا کوردستانێ، ئەڤرۆ ژی بەردەوامە د رۆلێ خۆ دا ل سیاسەت، ئابۆر، رێڤەبرن و پەروەردە و ب چالاکی پشکدارییێ د هەمی بیاڤێن ژیانێ دا دکەت.
"ئەم شانازییێ ب پێگەهـ و دەستکەفتێن ئافرەتێن کوردستانێ دبەین، لێ وێ ژی دزانین کو بۆ مسۆگەرکرنا مافێن وان و پاراستنا وان ژ توندوتیژی و جوداکاریێ، هەروەسا خورتکرنا پێگەهێ وان د هەمی کەرتان دا، کارکرنا هەمیئالی و پتر پێدڤییە." سەرۆکی ئەڤە ژی نڤیسییە.
سەرۆک نێچیرڤانی هەروەسا نڤیسیە: دویماهیئیان ب توندوتیژییا دژی ژنان، پاراستنا مافێن وان و دابینکرنا ژینگەهەکێ کو پشکداییا ئێکسان د هەمی بیاڤێن ژیانێ دا مسۆگەر بکەت، بەرپرسیارەتییەکا گشتی یە. ل سەر مە هەمییان پێدڤییە وەک کەس، خێزان، پەروەردە و گشت سازی و د ناڤ جڤاکی دا پتر بزاڤان بکەین بۆ پشتراستبوونا ژ وێ چەندێ کو کوردستان نمۆنەیەک بیت ژ ئێکسانی، دادپەروەری و مافێن مرۆڤی. هەروەکی هەردەم مە تەکەز ل سەر کری، بنیاتدانانا جڤاکەکا دیمۆکراسی و پێشکەفتی بێ مسۆگەرکرنا ماف و ئازادییا ژنێ و بهێزکرنا رۆل و پێگەهێ وێ د هەمی بیاڤان دا بەرهەم ناهێت.
سەرۆکی هەروەسا گۆتییە: د ڤێ یادێ دا ب رێز ڤە هەمی وان ژنێن قوربانییێن مەزن دایی و هەمی ئەوێن کو بووینە قوربانییێن توندوتیژی و توندرەوەیێ، ل بیر دئینین. بۆ بنەجهکرنا کلتوورێ پێکڤەژیان، لێبۆری و ئێکسانییێ، پابەندییا خۆ یا بەردەوام دووپات دکەین. چ ژ دەست مە بهێت کێمخەمییێ ناکەین بۆ بنیاتدانانا جڤاکەکێ کو تێدا ژن هەڤپشکەکا راستەقینە بیت د دروستکرنا پاشەرۆژێ دا.
سەرۆکی د دویماهییا پەیاما خۆ دا نڤیسییە: سلاڤ ل هەمی وان ژنان بن یێن کو ل پێناڤی مافێن خۆ خەباتێ دکەن. سلاڤ بۆ گیانێ قوربانییێن توندوتیژییێ، هەر یا بلند و ب نرخ بیت رۆژا جیهانی یا ژنان.