ل پارێزگەها دهۆکێ پتر ژ هزار و 500 فەرمانبەرێن پەروەردێ ل گەل ماموستا و سەرپەرشتیاران خانەنشین بووینە و وەزارەتا پەروەردێ پێشنیازەک بۆ پڕکرنا ڤالاهییا وان ماموستایێن خانەنشین بووین هەیە.
د. ئالان حەمە سەعید، وەزیرێ پەروەردێ ل حکومەتا هەرێما کوردستانێ بۆ گاڤ گۆت: ژبەر خانەنشینبوونا ماموستایان، ڤالاهی کەفتییە کەرتێ پەروەردێ، لەورا وان پێشنیازەک دایە جڤاتا وەزیران کو ئەو ماموستایێن خانەنشین بووین ئەڤ سالە ژی ل سەر کارێ خۆ دبەردەوام بن و جوداهییا مووچەیێ وان ژ ئالییێ حکومەتا هەرێما کوردستانێ ڤە بهێتە دان.
نەبیل شنگالی، بەرپرسێ راگەهاندنا پەروەردێ ل پارێزگەها دهۆکێ دەربارەی بابەتی بۆ گاڤ گۆت: ل پارێزگەها دهۆکێ ل گەل دەرکەفتنا یاسایا خانەنشینبوونێ تا رۆژا 31 هەیڤا کانوینا ئێکێ یا سالا 2024ێ، 1549 فەرمانبەر و ماموستا و سەرپەرشتیارێن پەروەردەیی خانەنشین بووینە و هەرچەندە وەزارەتێ ئەو پێشنیازا ڤەگەڕیانا ماموستایان تا تەمامبوونا وەرزێ خواندنێ یێ ئەڤ سالە دایە جڤاتا وەزیران، لێ تا نوکە جڤاتا وەزیران ئەو پێشنیاز پەسەند نەکرییە و ماموستا ڤەنەگەڕیاینە.
بەرپرسێ راگەهاندنا پەروەردێ ل پارێزگەها دهۆکێ هەروەسا گۆت: پار ل پارێزگەها دهۆکێ پتر ژ 11 هزار ماموستایێن وانەبێژ و ل زاخۆ پتر ژ 2 هزار وانەبێژان بووینە گرێبەست و نوکە ئەو ماموستا ل سەر کارێ خۆ دبەردەوامن.