سه‌رۆك نێچیرڤان بارزانى ل گه‌ل سه‌رۆكێ هه‌لبژارتییێ ئه‌مریكا كۆمبوو، كۆمبوون د چارچۆڤێ سه‌ره‌دانا فه‌رمى یا پاریسێ دا بوو.
ئیمانوێل ماكرۆن، سه‌رۆكێ فره‌نسا، ب فه‌رمى نێچیرڤان بارزنى، سه‌رۆكێ هه‌رێما كوردستانێ ل گه‌ل زێده‌تر ژ 50 سه‌رۆك و سه‌ركرده‌یێن جیهانێ داخوازى ڤه‌كرنا رێورسمى كربوون.
شڤێدى نێچیرڤان بارزانى، سه‌رۆكێ هه‌رێما كوردستانێ ل گه‌ل دۆنالد ترامپ، سه‌رۆكێ هه‌لبژارتییێ ئه‌مریكا ب ئاماده‌بوونا ئیمانوێل ماكرۆن، سه‌رۆكێ فره‌نسا كۆمبوو، كۆمبوون د چارچۆڤێ رێوره‌سمێن ڤه‌كرنا كاتێدرالا نۆتردام دابوو.
پشتى ب دویماهى هاتنا رێوره‌سمێن ڤه‌كرنا كاتێدرالا ل كۆچكا ئیلیزێ نێچیرڤان بارزانى ل گه‌ل سه‌ركرده‌ییێن جیهانێ ل كۆچكا سه‌رۆكایه‌تییا فره‌نسا ئاماده‌یى نانخوارنه‌كێ بوون.
سه‌رۆكایه‌تییا هه‌رێما كوردستانێ شه‌ڤا بۆرى راگه‌هاند، پشكدارییا سه‌رۆك نێچیرڤان بارزانى، د ریوره‌سمێ ڤه‌كرنا كاتێدرالا نۆتردام دا نیشانا دۆستایه‌تی و په‌یوه‌ندییێن بهێز یێن د ناڤبه‌را فره‌نسا و هه‌رێما كوردستانێ دایه، هه‌روه‌سا گرنگیا رۆل و پێگه‌هێ هه‌رێما كوردستانێ ل سه‌ر ئاستێ ناوچێ و په‌یوه‌ندییێن دپلۆماسى نێڤده‌وله‌تى نیشان دده‌ت.
پشتى پشكداریێ د رێوره‌سمێن ڤه‌كرنێ دا سه‌رۆك نێچیرڤان بارزانى ل پاریسێ گۆت: "ب ڤێ هه‌لكه‌فتا مه‌زن پیرۆزباهییێ ل هه‌ڤالێ خۆ سه‌رۆك ماكرۆنى دكه‌م".