نیچیرڤان بارزانى، سه‌رۆكێ هه‌رێما كوردستانێ سالا نوى ل ته‌ماما وه‌لاتیێن هه‌رێما كوردستانێ پیرۆز كر و گۆت: پێشهاتێن ناوچێ بهێزكرن، ته‌بایی و ئێكده‌نگییا ناڤخۆ د خوازن.
د پەیاما سەرۆک نێچیرڤان بارزانی دا هاتیە، ل سالا 2024ێ گوهۆڕین و وەچەرخانێن مەزن ل دەڤەرێ پەیداکرینە و کارتێکرن ل سەر رەوشا هەمی دەڤەرێ کریە، ئەڤ پێشهاتە پێدڤی ب هزرکرنەکا بلند و بهێزکرنا تەبایی و ئێکدەنگییا ناڤخۆ نە بۆ بەرهنگاربوونا وان مەترسیێن گەفان ل ئاسایش و سەقامگیریێ دکەن.
هەروەسا هاتیە، داخوازێ ژ هەمی ئالیێن سیاسی و پێکهاتەیێن کوردستانێ دکەم هەمی پێکڤە کاربکەن بۆ دەربازکرنا ناکوکیان و ب گیانەکێ بەرپرساتیا نشتیمانی یا هەڤپشک بەرەڤ پاشەرۆژێ گاڤان بهاڤێژن، د ڤێ رەوش و قووناغێ دا پێکڤەیی و کارێ هەڤپشک تاکە رێکە بۆ بهێزکرنا پێگەهێ هەرێما کوردستانێ و بدەستڤەئینانا مافێن مە یێن رەوا، ژ بەر ڤێ یەکێ دوپاتیێ ل گرنگیا بلەز پێکئینانا حکومەتا نوی دکەین.
سەرۆک نێچیرڤان بارزانی نڤیسیە ژی، د ڤێ بوونێ دا پابەندیا هەرێما کوردستانێ ب کارکرنێ ل گەل حکومەتا ئیراقێ و هەڤپشکێن هەرێمێ یێن نێڤدەولەتی بۆ بەرهنگاربوونا چالنجان و دیتنا چارەسەریێن هەردەمی بۆ کێشەیان دوپات دکەین، هاریکاریا د ناڤبەرا مە دا دێ بیتە ئەگەرێ سەقامگیری و ئاشتی و گەشەپێدانێ ل ئیراقێ و دەڤەرێ و دێ هاریکاریا پێکڤەژیانا ئاشتیانە یا گەلان و پێکهاتەیێن دەڤەرێ کەت.