نێچیرڤان باررزانى، سه‌رۆكێ هه‌رێما كوردستانێ ل دۆر كۆمبوونا خۆ یا ل گه‌ل محه‌مه‌د شیاع سوودانى، سه‌رۆكوه‌زیرێن ئیراقێ راگه‌هاند، سوپاسییا ئالیێن په‌یوه‌ندیدارێن ئیراقى دكه‌م بۆ سه‌رخستنا پرۆسێسا هه‌لبژارتنان و دوپاتیێ ل سه‌ر گرنگییا بهێزكرنا هاریكارییا ناڤبه‌را هه‌ولێر و به‌غدایێ ل قۆناغا بهێت دكه‌م.
ئه‌ڤرۆ سپیدێ چارشه‌مبێ 13-11-2024ێ نێچیرڤان بارزانى، سه‌رۆكێ هه‌رێما كوردستانێ ل گه‌ل محه‌مه‌د شیاع سوودانى، سه‌رۆكوه‌زیرێن ئیراقێ كۆمبوو.
د دیداره‌كێ دا ئه‌نجامێن هه‌لبژارتنێن په‌ڕله‌مانێ كوردستانێ، پێنگاڤێن پێكئینانا حكومه‌تا نوو یا هه‌رێما كوردستانێ، په‌یوه‌ندیێن هه‌ولێر و به‌غدا، ره‌وشا وه‌لاتى و دوماهى پێشهاتێن ناوچێ هاتنه به‌حسكرن.
سه‌رۆكوه‌زیران سوودانى پیرۆزباهى ل هه‌رێما كوردستانێ كر بۆ سه‌ركه‌فتنا هه‌لبژارتنێن په‌ڕله‌مانێ كوردستانێ و پشكدارییا ووه‌لاتییان ب شێوه‌یكی به‌رفه‌رب جهێ سه‌رنجێ ناڤكر كو پشكدارییا وه‌سا به‌رره‌هـ نیشانا هۆشیارییا سیاسى یا گه‌لێ كوردستانی یه و پابه‌ندبوونه ب پرۆسه‌یا دیمۆكراسیێ ڤه.
هه‌ر دو ئالییان ل سه‌ر گرنگییا بهێزكرنا میكانزما هه‌ڤكاریێ و هه‌ڤپشكیێ و پێدڤییا چاره‌كرنا دۆسیێن هه‌ڤپشك د ناڤبه‌را هه‌ولێر و به‌غدایێ ب رێكا دیالۆگا ئاڤاكه‌ر و پابه‌ندبوون ب ده‌ستوورێ ئیراقێ ڤه ئاخفتن و هه‌ر دو ئالى هه‌ڤڕا بوون كو به‌رده‌وامبوونا دانوستاندنان بۆ بهێزكرنا هاریكاریێ و گه‌شه‌پێدانا په‌یوه‌ندییان گرنگه.
ژ ئالیێ خۆڤه سه‌رۆك نێچیرڤان بارزانى، سوپاسییا پشته‌ڤانییا سه‌رۆكوه‌زیران ئه‌لسوودانى و ئالیێن په‌یوه‌ندیدار یێ ئیراقێ كر بۆ سه‌رخستنا هه‌لبژارتنان و دوپاتى ل سه‌ر گرنگییا بهێزكرنا هاریكاریێ د ناڤبه‌را هه‌ولێر و به‌غدایێ دا بۆ قۆناغا بهێت كر.
د ته‌وه‌ره‌كێ دى یێ كۆمبوونا خۆ دا پێشهاتێن رۆژهه‌لاتا ناڤین، كارتێكرنا وێ ل سه‌ر ئیراقێ هاته‌به‌حسكرن، د ڤى وارى دا هه‌ر دو ئالییان دوپاتى ل سه‌ر سه‌رخستا وه‌لاتى كر كو ژ لێكه‌فتنێن هه‌ڤڕكیێ دوور بیت و كارێ هه‌ڤپشك بۆ پاراستنا ئاساییش و سه‌قامگێریێ خواست.
په‌یوه‌ندیێن ئیراق و هه‌رێما كوردستانێ ل گه‌ل وه‌لاتێن جیران، ناوچێ و چاوانییا گه‌شه‌پێدانا وان ئالییه‌كێ دى یێ كۆمبوونێ بوو كو هه‌ژماره‌كا به‌رپرسێن هه‌ر دو ئالییان ژى ئاماده ببوون.