سه‌رۆكایه‌تییا كۆمارا توركیا راگه‌هاند، نێچیرڤان بارزانى و ئه‌ردۆگان ده‌مژمر 2ى پشتى نیڤرۆیا ئه‌ڤرۆ چاره‌شه‌مبێ 16-10-2024ێ دێ كۆمبن.
سه‌رۆكایه‌تییا كۆمارا توركیا به‌رنامه‌یێ كۆمبوونێن ئه‌ڤرۆ یێن سه‌رۆككۆمارێ توركیا به‌لاڤكریه و راگه‌هاند، ئه‌ڤرۆ ل ده‌مژمێر 02:00 پشت نیڤرۆ نێچیرڤان بارزانى، سه‌رۆكێ هه‌رێما كوردستانێ و ره‌جه‌ب ته‌یب ئه‌ردۆگان، سه‌رۆككۆمارێ توركیا دێ ل ئه‌نقه‌ره‌یا پایته‌ختێ توركیا كۆمبن.
دلشاد شه‌هاب، په‌یڤدارێ سه‌رۆكایه‌تییا هه‌رێما كوردستانێ راگه‌هاند، ئه‌ڤرۆ چارشه‌مبێ سه‌رۆكێ هه‌رێما كوردستانێ دی سه‌را توركیا ده‌ت و دێ ل ئه‌نقه‌ره‌یا پایته‌ختا وى وه‌لاتى ل گه‌ل سه‌رۆككۆمارێ توركیا، ره‌جه‌ب ته‌یب ئه‌ردۆگان كۆمبیت، هه‌ر دو ئالى دێ پێشڤه‌برنا په‌یوه‌ندییان، ره‌وشا ناوچێ و چه‌ندین مژار و پرسێن دى یێن د ناڤبه‌را ئه‌نقه‌ره، هه‌ولێر و به‌غدایێ دا ئێخنه به‌ر دانوستاندنێ.
ل گۆڕه‌یى زانیارییان پرسێن گرێدایى ئێمناهیێ، ئابۆر و پاراستنا سنۆران ژى ئالییه‌كێ دى یێ كۆمبوونا ناڤبه‌را سه‌رۆكێ هه‌رێمێ و سه‌رۆككۆمارێ توركیانه.
سه‌ره‌دانا نێچیرڤان بارزانى بۆ توركیا پشتى شه‌ش مه‌هێن سه‌ره‌دانا سه‌رۆككۆمارێ توركیا بۆ به‌غدا و پاشى بۆ هه‌ولێرێ دهێت، كو وى ده‌مى ل گه‌ل سه‌رۆك مه‌سعوود بارزانى، نێچیرڤان بارزانى، سه‌رۆكێ هه‌رێما كوردستانێ و مه‌سروور بارزانى، سه‌رۆكێ حكومه‌تا هه‌رێما كوردستانێ كۆمببوو.