سەرۆک بارزانی پەیامەک د یادا دامەزراندنا پارتی دا بەلاڤکر ئەڤا لخوارێ تێکستا وێ یە
بناڤێ خودێ مه‌زن و دلۆڤان
ب هه‌لكه‌فتا حه‌فتێ و هه‌شته‌مین سالیادا دامه‌زراندنا پارتى دیمۆكراتى كوردستان پیرۆزباهیێ ل هه‌موو كادر و ئه‌ندام و ئالیگرێن پارتى دكه‌م، پیرۆزباهیێ ل خێزانێن سه‌ربلندێن شه‌هیدان و پێشمه‌رگێ قه‌هره‌مان و هه‌موو چین و توێژ و پێكهاتێن كوردستانێ دكه‌م و هیڤییا سه‌ربلندى و خۆشیێ بۆ وان د خوازم.
دامه‌زراندانا پارتى ل شازده‌یى ته‌باخا 1946ێ ب رێبه‌رییا بارزانیێ نه‌مر زرووره‌ته‌كا دیرۆكى بوو بۆ درێژه‌پێدان ب خه‌بات و كۆلنه‌دانا گه‌لێ كورد ل وى ده‌مێ سه‌ختێ هه‌موو بزاڤێن نه‌یار و داگیركه‌رێن كوردستانێ ئه‌و كو شۆرش و ئازادیخوازییا گه‌لێ كوردستانێ سه‌ركوت و پشتگوهـ بهاڤێژیت، پارتى هه‌ر ل ژ ده‌ستپێكا دامه‌زراندنێ تا نوكه ئامرازه‌ك بوویه د ده‌ستێ خه‌لكێ كوردستانێ دا بۆ بجهئینانا ئارمانجێن دیمۆكراتى، نشتیمانى و نه‌ته‌وه‌یێن گه‌لێ كوردستانێ.
د حه‌فتێ و هه‌شته‌مین سالیادا دامه‌زراندنا پارتى دا دوپاتیێ ل وێ یه‌كێ دكه‌ین كو پارتى بۆ رزگاریا گه‌لێ كوردستانێ و خزمه‌تكرنا گه‌لێ كوردستانێ دروست بوویه و بۆ ڤێ یه‌كێ هاتییه دامه‌زراندن داكو خه‌لكێ كوردستانێ سه‌رفراز بن و دۆزا ره‌وا یا گه‌لێ كوردستانێ هه‌رده‌م یا پاراستى بیت و بهێز بیت، ژبه‌ر ڤێ یه‌كێ هه‌موو پارتى ل ئاست مه‌زناهییا دیرۆكى و قوربانیدانا حزبا خۆ و خوینا شه‌هیدان بن و ئه‌ركی خۆ ب باشترین شێوه بكه‌ن كو خزمه‌تكرن و بهێزكرنا كوردستانێ یه و هه‌موو لایه‌ك ب دۆست و نه‌یارێن گه‌لێ كوردستانێ ڤه وێ راستیێ دزانن كو چه‌ند پارتى بهێز بیت ل وى ده‌مى كوردستان ژى بهێزتره.
مه‌سعوود بارزانى
16ى ته‌باخا 2024ێ