نڤیسینگه‌ها سه‌رۆكوه‌زیرێن ئیراقێ ناڤه‌ڕۆكا كۆمبوونا سه‌رۆك مه‌سعوود بارزانى و محه‌مه‌د شیاع سوودانى، سه‌رۆكوه‌زیرێن ئیراقێ به‌لاڤكر.
نڤیسینگه‌ها سه‌رۆكوه‌زیرێن یئراقێ دیاركریه، ئه‌ڤرۆ چارشه‌مبێ سه‌رۆك مه‌سعوود بارزانى و شاندێ ل گه‌ل دا ل گه‌ل محه‌مه‌د شیاع سوودانى، سه‌رۆكوه‌زیرێن ئیراقێ كۆمبوو، دانوستاندن ل سه‌ر ئاستێ نشتیمانى، بجهئینانا به‌رنامه‌یێ خزمه‌تكارى، ئابۆرى و چاكسازى یێ حكومه‌تا ئیراقێ كر، ل سه‌ر بنه‌مایێ برێڤه‌چوونا كارێ ده‌وله‌تێ ل گۆڕه‌یى قانوون و ده‌ستوورى و باشتركرنا رێكخستنێ د ناڤبه‌را حكومه‌تێن ئیراق و هه‌رێما كوردستانێ دا، د وارێن جودا دا و هه‌روه‌سا گه‌ره‌نتیكرنا هه‌ڤكاریێ و گه‌هاندنا خزمه‌تكارییان بۆ هه‌موو وه‌لاتییێن ئیراقى.
نڤیسینگه‌ها سه‌رۆكوه‌زیر دیاركریه، دانوستاندن ل دۆر ره‌وشا ده‌ڤه‌رێ و كارڤه‌دانێن وێ ل سه‌ر ئێمناهى و ئارامییا ئیراق و هه‌رێما كوردستانێ ژى هاتنه كرن.
سه‌رۆكوه‌زیر كه‌یفخۆشییا خۆ هه‌مبه‌رى سه‌ره‌دانا سه‌رۆك بارزانى دیاركر و دوپاتكر، حكومه‌ت دێ ده‌رگه‌هێن گه‌شه‌پێدانێ و پاشه‌رۆژێ ڤه‌كه‌ت و دێ خێرێ بۆ هه‌موو وه‌لاتییێن ئیراقى ل هه‌ر جهه‌كى ڤه‌گه‌ڕینیت.
ژ ئالیێ خۆ ڤه سه‌رۆك بارزانى سوپاسییا سه‌رۆكوه‌زیرێ ئیراقێ و هاریكارییا وى كر، رۆلێ وى ژى د نه‌هێلانا ئاسته‌نگان دا ل گه‌ل هه‌رێما كوردستانێ بلند نرخاند.