سه‌رۆكێ هه‌رێما كوردستانێ ل گه‌ل عه‌لى باقرى، سه‌رپه‌رشتیارێ وه‌زاره‌تا ده‌رڤه یا ئیرانێ و شانده‌كێ ل گه‌ل دا كۆمبوو، دوپاتى ل گرنگییا په‌یوه‌ندیێن ئیران و كۆمارا ئیسلامى یا ئیرانێ ل گه‌ل ئیراق و هه‌رێما كوردستانێ كر.
ئه‌ڤرۆ نیڤرۆ ئه‌ینیێ 14-6-2024ێ نێچیرڤان بارزانى، سه‌رۆكێ هه‌رێما كوردستانێ ل هه‌ولێرێ ل گه‌ل عه‌لى باقرى، سه‌رپه‌رشتیارێ وه‌زاره‌تا ده‌رڤه یا ئیرانێ و شانده‌كێ ل گه‌ل دا كۆمبوو.
د كۆمبوونێ دا سه‌رۆك نێچیرڤان بارزانى و عه‌لى باقرى دوپاتی ل گرنگییا په‌یوه‌ندیێن كۆمارا ئیسلامى یا ئیرانێ ل گه‌ل ئیراق و هه‌رێما كوردستانێ كر، ل سه‌ر بنه‌مایێ جیرانییه‌كا باش و به‌رژه‌وه‌ندیێن هه‌ڤپشك، هه‌روه‌سا خواستا هه‌ر دو ئالییان به‌رده‌میدان بوو بۆ به‌ره‌ف پێشبرنا وارێن ئابۆرى و بازرگانى.
هه‌روه‌سا باقرى سوپاسیێن كۆمارا ئیسلامى یا ئیرانێ بۆ هه‌رێما كوردستانێ دوپاتكرن كو ئاسانكارییان پێشكێشى زیاره‌تكارێن ئیرانێ ل ده‌رگه‌هێن سنۆرى یێن هه‌رێما كوردستاێ دكه‌ت، ده‌ما سه‌را مه‌زار و جهێن پیرۆز ل باشۆرێ ئیراقێ دده‌ن.
ژ ئالیێ خۆ ڤه نێچیرڤان بارزانى، سوپاسییا هاریكارى و پشه‌ڤانییا ئیرانێ ل ئیراق و هه‌رێما كوردستانێ كر، دوپاتى ل هه‌بوونا په‌یوه‌ندیێن باش د ناڤبه‌را هه‌ولێر و ته‌هرانێ دا كر، هه‌روه‌سا ئیران ژى ب وه‌لات و جیرانه‌كێ گرنگ ل قه‌له‌م دا، هه‌ر د ڤى وارى دا ئاماژه ب په‌یوه‌ندیێن دیرۆكى ژى هاته دان.
ره‌وشا ناوچێ ب گشتى، پرسێن جهێ گرنگیپێدانا هه‌ر دو ئالییان ته‌وه‌ره‌كێ دى یێ كۆمبوونێ بوون كو هه‌ژماره‌كا به‌رپرسێن هه‌رێمێ ژى ئامادیى كۆمبوونێ بوون.