سه‌رۆكێ هه‌رێما كوردستانێ و بالیۆزێ بریتانیا كۆمبوون، هه‌لبژارتنێن په‌ڕله‌مانێ كوردستانێ، ره‌وشا ئیراقێ و ره‌وشا ناڤخۆ یا هه‌رێمێ مژارێن سه‌ره‌كى بوون.
ئه‌ڤرۆ پشتى نیڤرۆ پێنجشه‌مبێ 6-6-2024ێ نێچیرڤان بارزانى، سه‌رۆكێ هه‌رێما كوردستانێ ل گه‌ل ستیڤن هیچنن بالیۆزێ بریتانیا ل ئیراقێ كۆمبوو.
د كۆمبوونێ دا په‌یوه‌ندیێن بریتانیا ل گه‌ل ئیراق و هه‌رێما كوردستانێ، ره‌وشا ئیراقێ ب گشتى، هه‌لبژارتنێن په‌ڕله‌مانى و ره‌وشا ناڤخۆ یا هه‌رێما كوردستانێ، په‌یوه‌ندیێن هه‌ولێر و به‌غدایێ و دانوستاندنێن چاره‌كرنا كێشه‌یێن ناڤبه‌را وان به‌حسكرن.
هه‌ر دو ئالییان دوپاتى ل به‌رده‌وامییا چاره‌كرنا كێشه‌یێن هه‌ولێر و به‌غدایێ ل سه‌ر بنه‌مایێ ده‌ستوورى و پاراستنا مافێن هه‌موویان كر، د ڤى وارى دا سه‌رۆك نێچیرڤان بارزانى دوپاتكر، كو كلیلا سه‌قامگێریێ ل ئیراقێ، لێكتێگه‌هشتنا هه‌ڤپشكا هه‌ولێر و به‌غدایێ یه بۆ چاره‌كرنا بنه‌ڕتى یا كێشه‌یان و بجهئینانا ده‌ستوورى.
هه‌روه‌سا هه‌ر دو ئالى هه‌ڤڕابوون ل سه‌ر گرنگییا برێڤه‌چوونا پرۆسێسا هه‌لبژارتنێن په‌ڕله‌مانێ كوردستانێ ب پشكدارییا هه‌موو ئالى و پێكهاتان د ده‌مه‌كێ گونجایى یێ ئه‌ڤ ساله دا، بالیۆزێ بریتانیا رۆلێ بزاڤێن نێچیرڤان بارزانى، سه‌رۆكێ هه‌رێما كوردستانێ بۆ برێڤه‌چوونا هه‌لبژارتنان بلند نرخاند.
د ته‌وه‌ره‌كێ دى دا كو كونسلێ گشتى یێ برتیانیا ل هه‌ولێرێ ژى ئاماده‌ببوو، دوماهى پێشهاتێن ناوچێ و هنده‌ك پرسێن جهێ گرنگیدانا هه‌ر دو ئالییان به‌حسكرن.