ب بزاڤێن بەردەوام یێن جڤاتا كوردی ل ئەلمانیا، زمانێ كوردی بۆ سیستەمێ فێركرن و تاقیكرنا تیۆری یا مۆلەتا شۆفێرییێ هاتە زێدەكرن و ئەڤسالە كوردێن ئەلمانیا دشێن ب زمانێ كوردی دیالێكتا كرمانجی پشكدارییێ د تاقیكرنا مۆلەتا شۆفێرییێ دا بكەن و بزاڤ دهێنەكرن شێوەزارێ سۆرانی ژی بهێتە زێدەكرن.
بۆ وێ مەرەمێ ژی نڤیسینگەهەك ل بەرلینا پایتەختێ وی وەلاتی هاتییە ڤەكرن و تێدا ئەو كەسێن دڤێت مۆلەتا شۆفێرییێ دەربێخن و ب ئەگەرێ نەزانینا زمانێ ئەلمانی تووشی كێشەیان بووین، دشێن خۆ بۆ پشكدارییێ د تاقیكرنا تیۆری و پراكتیكی دا ئامادەبكەن.
بۆ دەمێ سێ سالایە جڤاتا كوردی ل ئەلمانیا ب هاریكارییا هەر ئێك ژ تۆبیاس هۆخ، ڕۆژنامەنڤیسێ ئەلمانی و دۆستێ كوردان و ئۆلیڤەر لوکسیچ، پەڕلەمانتارێ ئەلمانیا د بزاڤێن جێگیركرنا زمانێ كوردی دانە دناڤ سیستەمێ فێركاری و دەرێخستنا مۆلەتا شۆفێرییێ دا، ئەڤسالە بزاڤێن وان گەهشتنە ئەنجامێ دوماهییێ و هاتە پەسەندكرن.