هه‌رێما كوردستانێ و توركیا ل سه‌ر چاره‌كرنا كێشه‌یێن دناڤبه‌را هه‌رێما كوردستانێ و حكومه‌تا ئیراقێ دا ب رێكا دانوستاندنێ و ل سه‌ر بنیاتێ ده‌ستوورى د هه‌ڤڕا بوون.
حكومه‌تا هه‌رێما كوردستانێ د به‌یانه‌كێ دا به‌حس ل كۆمبوونا دناڤبه‌را شاندێن هه‌رێما كوردستانێ و توركیا دا كو سه‌رۆك نێچیرڤان بارزانى و سه‌رۆك وه‌زیر مه‌سروور بارزانى و ره‌جه‌ب ته‌یب ئه‌ردۆگان سه‌رۆككۆمارێ توركیا و هژماره‌یه‌كا وه‌زیر و به‌رپرسێن هه‌رێما كوردستانێ و توركیا تێدا به‌رهه‌ڤ ببوون، كریه.
حكومه‌تا هه‌رێمێ دیاركریه "د كۆمبوونه‌كا هه‌ڤپشك دا كو چه‌ندین به‌رپرسێن بلند یێن هه‌رێما كوردستانێ تێدا به‌رهه‌ڤ ببوون، دانوستاندن ل دۆر پێشڤه‌برنا په‌یوه‌ندیێن دوقولى و دویماهیك گوهۆڕینێن ئیراقێ و ده‌ڤه‌رێ هاته كرن".
راگه‌هاندیه ژى "هه‌ردو لایه‌ن ل سه‌ر گرنگییا پاراستنا ئاسایش و سه‌قامگیرییا ده‌ڤه‌رێ و چاره‌كرنا كێشه‌یێن دناڤبه‌را هه‌رێما كوردستانێ و حكومه‌تا فیدرالى دا ب رێكا دانوستاندنێ و ل سه‌ر بنیاتێ ده‌ستوورى د هه‌ڤڕا بوون".
هه‌روه‌سا به‌حس ل پێشڤه‌برنا هه‌ماهه‌نگى و هاریكارییا هه‌ڤپشك د بوارێ پێشڤه‌برنا ئالوگۆرییا بازرگانى و وه‌به‌رهێنانێ دا هاته كرن.
ره‌جه‌ب ته‌یب ئه‌ردۆگان سه‌رۆككۆمارێ توركیا پشتى ب دویماهیك هاتنا سه‌ره‌دانا به‌غدا، ئه‌ڤ شەڤێدی گه‌هشتبوو هه‌ولێرێ و ل فڕۆكه‌خانه‌یا هه‌ولێرێ یا نێڤده‌وله‌تى ژ لایێ نێچیرڤان بارزانى سه‌رۆكێ هه‌رێما كوردستانێ ڤه پێشوازى لێ هاتبوو كرن.
هه‌ر د سه‌ره‌دانا سه‌رۆككۆمارێ توركیا و شاندێ ل گه‌ل دا بۆ به‌غدا، 26 یاداشتنامه‌یێن لێكتێگه‌هشتنێ و رێككه‌فتن دناڤبه‌را ئیراقێ و توركیا دا هاتبوونه ئیمزاكرن.