نێچیرڤان بارزانی، سەرۆکێ هەرێما کوردستانێ پشکداری هەشتەمین دیدارا زانکۆیا ئەمریکی یا سلێمانییێ بوو و د گۆتارەکێ دا بەحسێ کێشەیێن هەرێما کوردستانێ، ئیراقێ و رۆژهەلاتا ناڤین کر و چەندین پێشنیازێن ئاشتییانە بۆ چارەکرنا کێشەیان دان.
نێچیرڤان بارزانی، سەرۆکێ هەرێما کوردستانێ ئەڤرۆ ل سلێمانییێ پشکداری هەشتەمین دیدارا زانکۆیا ئەمریکی یا سلێمانییێ بوو کو ب ناڤێ "ئالۆزی و نەسەقامگیرییا رۆژهەلاتا ناڤین"ە. د ڤێ دیدارێ دا سەرۆک نێچیرڤان بارزانی د گۆتارەکێ دا راگەهاند: رۆژهەلاتا ناڤین د رەوشەکا گەلەک ب ترس دایە، ب تایبەت رەوشا د ناڤبەرا ئسرائیل و فەلەستینێ دا و چارەیا وی شەڕی، دانوستاندن و راگەهاندنا دەولەتا سەربەخۆ یا فەلەستینێ یە و هەرێما کوردستانێ پشتەڤانییا چێبوونا دەولەتەکا فەلەستینی یا سەربەخۆ دکەت.
دەربارەی رەوشا ئیراقێ، سەرۆک نێچیرڤان بارزانی گۆت: پێدڤییە ب بجهئینانا دەستووری و سیستەمێ فیدرالی و دانوستاندنێن ئاشتییانە، کێشەیێن ئیراقێ چارە ببن، ژبەر کو، ئیراقەکا بهێز پێدڤی ب هەرێما کوردستانێ یە و کوردستانەکا بهێز ژی، پێدڤی ب ئیراقەکا فیدرالی یە.
دەربارەی کێشەیێن ناڤخۆ یێن هەرێما کوردستانێ، سەرۆک نێچیرڤان بارزانی دوپات کر: پێدڤییە ئالییێن سیاسی رێک بکەڤن، ژبەر کو کوردستان ژ هەموویان مەزنترە و پەرلەمانێ کوردستانێ ژی ئێک ژ گرنگترین سازییێن هەرێما کوردستانێ یە، لەورا پێدڤییە ئالییێن سیاسی ل سەر هەلبژارتنێن پەرلەمانێ کوردستانێ رێک بکەڤن.
سەرۆک نێچیرڤان بارزانی، د بەردەوامییا گۆتارا خۆ دا ئاماژە دا وەلاتێن هەڤسۆ و راگەهاند: تورکیا و ئیران ژ هەڤپەیمانێن ئابۆری یێن هەرێما کوردستانێ و ئیراقێ نە، لەورا ئەو ب چ رەنگان قەبویل ناکەن هەرێما کوردستانێ ببیتە ژێدەرێ گەفێ بۆ سەر ئاشتی و ئارامییا چ وەلاتان، ژبەر کو، ئالاڤێ پێشکەفتنێ ئاشتی یە نە شەڕ.