ئەڤرۆ جەژنا سەرسالا ئێزدییانە کو ب جەژنا کنیاتێ و جەژنا چارشەمبییا سۆر دهێتە ناڤکرن و د ڤێ جەژنێ دا ئێزدی چەندین چالاکییان دکەن.
د میتۆلۆژییا ئێزدییان دا ئه‌ڤ جه‌ژنه جه‌ژنا كنیاتێ یه و ب رۆژا جه‌برینا ئه‌ردى دهێتە ناڤکرن. هێك خانه‌یا پێكهاتەیا زینده‌وه‌رانه و ژیان بێی خانه نابیت و بێی خانە زێده‌بوون نینه، له‌و د ڤێ جه‌ژنێ دا ئێزدى هێكان سۆر دكه‌ن.
هێڤێن، هه‌ڤیر و هه‌ڕى هه‌ر سێ نیشانێن جه‌برینێ نه و ب باوەرا ئێزدییان بێى جه‌برین ئه‌رد چێنه‌بوویه، لەوما ئێزدی د ڤێ جەژنێ دا هندەک هەڤیری و هەڕییێ ل بەری رۆژهەلاتنێ ل بەر دەرگەهێن مالێن خۆ ددەن.
ئێزدی د ڤێ جەژنێ دا دبێژنە کارییێ (بێناڤ) و هەر ل گۆرەی باوەرییا ئێزدییان، بەری جەبرینا ئەردی، کنیات هەموو بەهەشت بوو، خرابی نەبوو، لێ پشتی جەبرینا ئەردی خرابی پەیدابوویە. د ناڤ ئێزدییان دا تیژاتی نیشانا خرابییێ یە و کولیلکێن سۆر نیشانا باشی و کەیف و خۆشییێ نە، لەو د ڤێ جەژنێ دا قەفتەکا کولیلکان و هندەک کارییێ ژی ل گەل هەڤیری و هەڕییێ ل بەری رۆژهەلاتنێ ل بەر دەرگەهێن مالێن خۆ ددەن.