ئه‌ڤرۆ دوشەمبی (1 ی نیسانا 2024) ێ" ل سەلاحەدین، سەرۆك مەسعود بارزانی پێشوازی ل یان برایم، كونسولێ گشتییێ فرەنسا ل هەولێرێ كر.
د وێ دیدارێ دا رۆناهی خستە سەر بابەتێ هەلبژارتنێن پەرلەمانێ هەرێمێ و هەلویست و تێبینیێن پارتی ل سەر هەلبژارتنان" كونسولێ گشتییێ فرەنسا ل هەولێرێ" زێده‌باری ئاماژەدان ب گرنگییا هەلبژارتنان ل هەرێما كوردستانێ راگەهاند، وه‌لاتێ وی ل گەل هندێیە كو هەرێما كوردستانێ ب هێز و سەقامگیر بیت و ئالۆزی و نیگەرانییێن دناڤبه‌را لایەنێن سیاسی یێن هەرێمێ دا بهێنه چارەسەر كرن.
كونسولێ گشتییێ فرەنسا ل هەولێرێ، ئامادەییا وه‌لاتێ خۆ نیشاندا بۆ هاریكاریكرنا لایەنێن هەرێما كوردستانێ ژ پێخه‌مه‌ت ده‌ربازكرنا قەیرانێن سیاسی و چارەسەركرنا گرفتان ل گەل حكومەتا عێراقێ.
هەر د وێ دیدارێ دا سەرۆك بارزانی ستایشا رۆلێ فرەنسا كر كو پشته‌ڤانا دۆزا گەلێ كوردستانێ بوویە و پەیوەندییێن دناڤبه‌را گەلێ كوردستانێ و گەلێ فرەنسا ب پەیوەندییێن مێژوویی و بێ وێنە وەسف كرن.
سەرۆك بارزانی دوپاتكر" كو پارتی ئاڤاكه‌را شەرعیەت و هەلبژارتنێن هەرێمێ بوویە، د ماوێ دو سالان پارتی هەموو بزاڤكرن كو هەلبژارتن د ده‌مێ خۆدا بهێنه ئەنجامدان" به‌لێ ڕێگری ل ئه‌نجامدانا هەلبژارتنان هاته كرن، ب ئاشكرا پەنا بۆ دەستێ دەرەكی و دادگەها فیدڕالی هاته برن بۆ هندێ كێشە بۆ هەلبژارتنێن پاقژ بهێنه دروست كرن.
سەرۆک بارزانی گۆت ژی: بێ بەهركرنا پێكهاتێن نەتەوەیی و ئایینان ژ هەڵبژارتنان، بێ بەهركرنا سەدان هزار دەنگدەران ژ دەنگدانێ، بێ به‌هركرنا هەلەبجە ژ ژمارا حەقیقی یا كورسییان و سەپاندنا ڕێكارێن نه دروست د ئه‌نجامدانا هەلبژارتنان دا، وه دكه‌ت كو هەلبژارتن تەعبیرێ ژ دەنگێ ڕاستەقینە یێ خەڵكێ كوردستانێ نەكه‌ت.
سەرۆك بارزانی دیار كر ژی، پارتی ل گەل هندێیه كو هەلبژارتنه‌كا پاقژ و ئازاد بێی دەستێوەردان و دیزاینا پێشوەخت بهێته كرن" هەلوێستێ پارتی ل هه‌مبەر هندێ بوو كو پیلانا دەست ب سەرداگرتنا ئیرادا خەڵكێ كوردستانێ سەرنەگریت.
سەرۆك بارزانی ب پێدڤی زانی" كو هەموو ئەو كێماسییێن تەكنیكی و بنپێكرنێن دەستووری و یاساییانە بهێنه چارەسەر كرن و ئیرادە و دەنگێ ڕاستەقینە یێ گەلێ كوردستانێ دوور ژ پیلان و ئەنجامێن پێشوەخت سەر بگریت" داخواز كر كو جڤاكێ نێڤدەولەتی هاریكار بیت بۆ چاڤدێری و گەرەنتیكرنا هەلبژارتنه‌كا ئازاد و ڕاستەقینە كو د خزمەت شەرعیەت و دەنگێ ڕاستەقینە یێ گەلێ كوردستانێ دابیت.