سه‌رۆك نێچیرڤان بارزانى رادگه‌هینیت، لۆژیكێ هێزێ زیانه‌كا مه‌زن ب ئیراقێ گه‌هاند، وه‌رن پێكڤه مافێن ده‌ستوورى و قه‌واره‌یێ هه‌رێمێ ب پارێزین.
نێچیرڤان بارزانى، سه‌رۆكێ هه‌رێما كوردستانێ په‌یامه‌ك د 54 سالییادا رێككه‌فتنامه‌یا 11ى ئادارێ یا سالا 1970یێ دا به‌لاڤكر و راگه‌هاند، ئه‌ڤرۆ یادا 54 سالییا رێككه‌فتننامه‌یا یازده‌یى ئادارێ دكه‌ین كو د ناڤبه‌را ده‌ستهه‌لاتا وى ده‌مى یا ئیراقێ و شۆڕشا مه‌زن یا ئیلۆنێ دا ب رێبه‌رییا بارزانیێ نه‌مر هاته ئیمزاكرن، رێككه‌فتننامه‌یا یازده‌یى ئادارێ وه‌چه‌رخانه‌كا چاره‌نڤێساز و ئێكه‌م به‌لگه‌نامه‌یا فه‌رمى یا دیرۆكى یا هه‌ڤچه‌رخ بوو، به‌رهه‌مێ تێكۆشین و قوربانیدانا گه‌لێ كوردستانێ بوو كو حكومه‌تا ئیراقێ نه‌چاركر دانپێدانێ ب هنده‌ك مافێن ره‌وا بكه‌ت و بوو بناغه‌یێ هه‌موو ده‌ستكه‌فتێن پشتى هنگى یێن گه‌لێ كوردستانێ.
سه‌رۆك نێچیرڤان بارزانى دبێژیت: دڤێ یادا دیرۆكى یا تژى نه‌هامه‌‌تییا ده‌وله‌تا ئیراقێ ل بیرا هه‌مووان دئینین كو لۆژیكێ هێز، هزر و سیاسه‌تا بنپێكرنا مافێن گه‌لێ كوردستانێ و پێكهاتێن ئیراقێ ب گشتى چ زیان ب وه‌لاتى گه‌هاندى یه؟ پاشڤه‌زڤڕینا ده‌ستهه‌لاتا وى ده‌مى یا ئیراقێ ژ رێككه‌فتنامێ و شه‌ڕ و مالوێرانى و كاره‌سات و نه‌ئارامییه‌كا به‌رده‌وام بۆ ئیراق و گه‌لێ وێ ل پاش خۆ هێلا و تا نوكه ژى به‌ردوامه.
سه‌رۆكێ هه‌رێما كوردستانێ دیاردكه‌ت، بلا ل هه‌رێما كوردستانێ ڤێ یادێ بكه‌ینه ده‌لیڤه‌یه‌ك بۆ لێكتێگه‌هشتنا هه‌ڤپشك یا هه‌موو ئالیێن سیاسى بۆ ده‌ربازكرنا كێشه و ناكۆكییان دا پێكڤه به‌رهنگارى ئاسته‌نگان بین و ده‌ستكه‌فتێن خۆ یێن ده‌ستوورى و قه‌واره‌یێ هه‌رێما كوردستانێ ب پارێزین، ل ئیراقێ ژى په‌ند و وانه‌یێن بۆرى و دیرۆكا پڕى ئازار یا وه‌لاتى وه‌ربگرین، ده‌ستوورى بجهـ بینین، سیسته‌مێ فیدرالى و مافێن هه‌موو گه‌ل و پێكهاتێن ئیراقێ ب پارێزین و ب دیتنه‌كا هه‌ڤپشك به‌ره‌ف پاشه‌رۆژێ پێنگاڤان بهاڤێژین و سلاڤ ژى بۆ گیانێ شه‌هیدان هه‌بوون.