وه‌زیرێ دارایى و ئابوورى یێ هه‌رێما كوردستانێ راگه‌هاند؛ ئه‌گه‌ر به‌غدا پاره‌ى بهنێریت دێ ب زویترین ده‌م مووچه‌یان دابه‌شكه‌ین، دیار ژى كر كو ئه‌و چاڤه‌رێ نه به‌غدا مووچه‌یێن هێزێن ئه‌منى و پێشمه‌رگه‌ى بهێنریت دا كو ئه‌و مووچه‌ى دابه‌شبكه‌ن.
ئاوات شێخ جه‌ناب وه‌زیرێ دارایى ئه‌ڤرۆ شه‌مبیێ راگه‌هاند "بۆ دابه‌شكرنا مووچه‌ى، ئه‌م چاڤه‌رێ نه به‌غدا مووچه‌یێن هێزێن ئه‌منى و پێشمه‌رگه‌ى بهنێریت".
ئاشكرا ژى كر "ئه‌گه‌ر به‌غدا پاره‌ى بهنێریت دێ ب زویترین ده‌م مووچه‌یان دابه‌شكه‌ین چونكى تا نوكه به‌غدا پاره‌یێ پێدڤى بۆ مووچه‌خۆران ب ته‌مامى نه‌هنارتییه و مژویلى گه‌هشتنێ ب رێككه‌فتنێ نه ل دۆر ڤى بابه‌تى".
ديار ژى كر "هه‌مى كارێن هنارتنا لیستا مووچه‌خۆران هاتینه ب ئه‌له‌كترۆنیكرن و ل هه‌مى هه‌یڤان ب ئێك كلیك دێ شێین سه‌رجه‌م لیستان بهنێرین".
ل دۆر داهاتێ ناڤخۆ دیاركر "هه‌یڤانه نزیكى 300 بۆ 350 ملیار دینارانه، نزیكى 15% ژ داهاتێ ناڤخۆ ب شێوه‌یێ كاش نینه، ژ داهاتێ ناڤخۆ 180 ملیار دینار بۆ مووچه‌یان هاتینه دان، 60 ملیار دینار ژى بۆ نه‌سریه‌یان، نزیكى 100 ملیار دینارێن دى ژى بۆ خه‌رجیێن وه‌به‌رهێنانێ، بكاربرنێ، ده‌رمانان و كاره‌بێ و ژماره‌یه‌كا تشتێن دى هاتینه خه‌رجكرن".
وه‌زیرێ دارایى هه‌روه‌سا داخواز كر به‌غدا وه‌كى هه‌مى داموده‌زگه‌هێن دى یێن ئیراقێ مامه‌له‌یێ ل گه‌ل هه‌رێما كوردستانێ بكه‌ت.
حكومه‌تا ئیراقێ تا نوكه نزیكى 600 ملیار دیناران بۆ مووچه‌یێن مووچه‌خۆرێن هه‌رێمێ بۆ هه‌یڤا شوباتێ یا بۆرى هنارتینه، لێ ل گۆره‌ى حكومه‌تا هه‌رێما كوردستانێ هێشتا كورتئینان بۆ دابه‌شكرنا مووچه‌یان هه‌یه