ئاکرێ نیوز
ژدایک بوونا بارزانی، ژ دایک بوونا سەردەمەکێ نوی یێ کوردایەتیێ بوو
زۆربەی بوویەرێن دیرۆکی سەرکردا درۆست دکەن ، لێ بارزانیێ نەمر دیرۆک درۆست کر، بەری ١٢١ ساڵا دناڤ ماڵباتا بارزان یا ئاییندار و شۆرەشگێر و مرۆڤ پەروەردا ستێرەکا دیتر ژ ستێرێن رێبەرایەتیێ و مرۆڤ پەروەریێ ژ دایک بوو، ئەو ژی ژدایک بوونا مەلا مستەفایێ بارزانی بوو.
راستە بەری ژ دایک بوونا بارزانی بزاڤ و شۆڕەشێن کوردی یێن رزگاریخوازی هەبوون و ماڵباتا بارزان ژی سەرکردایەتیا بەشەکێ زۆرێ وان دکر، لێ ب هاتنا بارزانی نەمر ستێرەکا گەش د ئەسمانێ بزاڤا رزگاریخوازیا کوردستانی دا برسقی و رەونەق لسەرتاسەرێ کوردستانێ دایەڤە،
ب هەبوونا بارزانی وەکی سەرکردێ گەلێ کورد بزاڤا رزگاریخوازیا کوردستانی یا چارچۆڤەکری و سنووردار بوویە بزاڤەکا نشتیمانیا سەرتاسەری نەخاسمە ل شۆرەشا مەزنا ئیلۆنێ ل (١٩٦١ ـــ ١٩٧٥) کۆ ژلایێ لەشکری هێزێن پێشمەرگەهێن کوردستانێ هاتنە دیسپلینکرن و پەروەردەکرن لسەر هزرا نشتیمانی و هەستا نەتەوەیی و داستانێ مەزن و دیرۆکی ژی هاتنە تۆمارکرن و دەستکەفتێن مەزن ژی بدەست هاتن و دوزا سیاسی یا کوردستانی بوویە دوزەکا جیهانی و قۆناغێن مەزن بەرەڤ پێشکەفتنێ هاتنە بڕین.
ژلایێ سیاسی و دبلۆماسی ژی سیمایەکێ زۆرێ پێشکەفتی بخۆڤە دیت و کادر و سەرکردێن ژێ هاتی دناڤ پارتی دیموکراتی کوردستان هاتنە پێگەهاندن و رێکخستنەکا پۆلایی ژی هاتە ئاڤاکرن، ب سەرۆکاتیا بارزانیێ نەمر پارتی دیموکراتی کوردستان و بزاڤا رزگاریخوازیا کوردستانی بوویە خودان پێگەهەکێ مەزن ل دەڤەرێ و باشوورێ کوردستانێ بوویە سەنتەرێ هزرا نشتیمانی و نەتەوایەتی کوردستانی و ئۆمێدا کوردێن سەرتاسەرێ جیهانێ ، بارزانی ژی ب خەباتا خۆ یا ڕەواو و دادپەروەرانە ژ پێخەمەت بدەست ئینانا ماف و ئارمانجێن خەلکێ کوردستانێ ب هەم پێکهاتێن نەتەوی و ئۆلی و ئەتنی ، بوویە بابێ دیرۆکی و رووحی و ناڤەکێ نەمر د دیرۆکا گەلێ کوردا دا.
لەوما ب شانازیڤە ب هەبوونا بارزانی سەردەمەکێ نوی و پێشکەفتی یێ کوردایەتیێ ل باشوورێ کوردستانێ سەرهەلدا و بوویە ئاوێنە بوو بەشێن دیترێن کوردستانێ.
بۆمە وەکی پارتی دیموکراتی شانازیەکا مەزنە کۆ وخودان ئەڤ رێبەرێ مەزنین و ئەڤرۆ ژی لسەر هزر و فەلسەفا بارزان و کەلەپۆرێ دەولەمەندێ بارزانی نەمر درێژیێ ب سەرکردایەتیا بزاڤا رزگاریخوازیا کوردستانی د دەین و بەڕەڤانیێ ل قەوارێ سیاسی و دەستووریێ هەرێما کوردستانێ دکەین ، ئەو قەوارێ ب خەبات و قوربانیدانا پارتی و ب رێبەرایەتیا بارزانیێ نەمر و پاشان ب حیکمەت و سیاسەتا سەرۆک مەسعوود بارزانی هاتیە بەرهەم .
بڤێ هەلکەفتا رۆژبوونا بارزانی نەمر سۆزێ د دەین پێشمەرگەهــ و خزمەتکارێن گەلێ خۆ بین و یێن بەردەوام بین هەتا بدەست هاتنا ماف و ئارمانجێن خەلکێ کوردستانێ، رۆژبوونا بارزانی نەمر پیرۆز بیت ل تەڤایا نشتیمان پەروەرێن کوردستانێ .
لقا ٩ یا پارتی دیموکراتی کوردستان
روژا پێنچ شەمبی ١٤ێ ئادارا ٢٠٢٤ێ