پشتی هێرشێن بێ بنەمایێن موشەکییێن سوپایێ پاسدارێن ئێرانێ بۆ سەر ماڵا شەهید پێشڕەو مەجید دزەیی، کو بوویە ئەگەرێ شەهیدبوونا وی و ژینایا کچا وی یا تەمەن یازدە هەیڤی، هەروەسا برینداربوونا هەڤژین و کوڕێن وی و شەهید و برینداربوونا چەند وەلاتییەكێن سڤیل، ڕۆژا شەممە 27ی کانوونا دووێ 2024، ل سەلاحەدیین سەرۆک مەسعود بارزانی پێشوازی ل مالباتا شەهید پێشڕەو دزەیی کر.
د دیدارێدا، سەرۆک بارزانی دووبارە پرسە و سەرەخۆشییێن خوە ب مالباتا شەهید پێشڕەو ڕاگەهاند و هیڤیا چاکبوونێ بۆ برینداران خواست، هەروەسا سەرۆک بارزانی ئاماژە ب وێ یەكێ دا کو ئەو تاوان زوڵمەکا مەزن بوو بەرانبەر مالباتا شەهید پێشڕەو دزەیی و خەڵکی کوردستانێ هاتییە كرن.
هەر د دیدارێدا کەسایەتی و تێکۆشەرێ دێرینێ کوردستانێ موحسین دزەیی سوپاسییا پشتەڤانی و هەڵوێستێ سەرۆک بارزانی کر کو هەر ل ڕۆژا ئێكێ ئەو کارەسات ب خەما خوە زانییە و هەروەسا سوپاسییا ئامادەبوونا سەرۆک بارزانی ل رێورەسمێن ڤەشارتنا تەرمێن شەهیدێن ئەوێ ڕوودانا کارەساتبار کر. هەر د دیدارێدا عەبدوڵلا مەجید دزەیی ب ناڤێ خوە و مالبات و هەر سێ برایێن شەهید پێشڕەو پێزانینێن خوە بۆ هەڤسۆزییا سەرۆکی نیشان دا و سۆزا وێ یەكێ ژی دا كو ئەو هەمی ل سەر رێبازا شەهید پێشڕەو دزەیی بۆ ئاڤەدانی و خزمەتکرنا خەڵکێ کوردستانێ دێ بەردەوام بن.