جڤاتا ئاسایشا هەرێما كوردستانێ راگەهاندنەك دەربارێ هێرشا مووشەكی یا سەر هەولێرێ بەڵاڤکر و ئاماژە ب وێ کر، د ئەنجامێ هێرشا مووشەكییا سەر هەولێرێ، چار ولاتیێن سڤیل شەهید بوون و شەش ژی بریندار بوون.
جڤاتا ئاسایشا هەرێما كوردستانێ ڕاگەهاندنەك دەربارێ هێرشا مووشەكییا سەر هەولێر بەڵاڤکر، تێدا هاتیە: "دەمژمێر 11:30ێ شەڤا 15 لسەر 16یا کانوونا دووێ 2024، لەشکەرێ پاسدارێن ئیرانێ ب چەندین مووشەکێن بالیستیکی چەند دەڤەرێن سڤیڸ نشینێن هەولێرێ بۆمبەباران کرن، مخابن ل دیف ئامارێن دەست پێکێ چار ولاتیێن سڤیل شەهید بوون و 6 ژی بریندار بوون، کو رەوشا ساخلەمیا هندەك ژ برینداران یا گرانە."
ئەو ژی دیار کر: "لەشکەرێ پاسداران راگەهاندیە، ئەف هێرشە بۆ سەر چەند پێگەهێن گرووپێن دژی ئیرانێ بوویە، ئەم ڤێ هێجەتا بێبنەمایە و رەت دکەین، مخابن هەردەم هێجەتێن بێبنەما بۆ هێرشکرنە سەر هەولێرێ بکار تینن و هەولێر وەکە دەڤەرەکا سەقامگیر چ دەما ژێدەرێ گەفان بۆ سەر چ لایەنەکێ نەبوویە."
جڤاتا ئاسایشا هەرێما كوردستانێ تەکەز کر: "ئەڤە بنپێکرنەکا ئاشکرا یا سەروەرییا هەرێما كوردستان و عێراقێیە و پێتڤیە حکوومەتا فیدرال و جڤاکا ناڤدەولەتی ل ڤێ تاوانێ بێدەنگ نەبن."