ئه‌ڤرۆ سپێدێ ئه‌مریكا هێرشه‌ك كره سه‌ر حووسیێن یه‌مه‌نێ، وه‌ك به‌رسڤه‌ك بۆ هێرشا حووسیان ل سه‌ر كه‌شتیه‌كا په‌ترۆلێ یا بریتانیا ل كه‌نداڤێ عه‌ده‌ن دهێت.
فه‌رمانده‌یا سه‌ربازى یا ئه‌مریكا ل رۆژهه‌لاتا ناڤین (سێنتكۆم) دیاردكه‌ت، ئه‌مریكا مووشه‌كه‌كا حووسیان كریه ئارمانج كو دێ بۆ سه‌ر كه‌شتیێن وان ل ده‌ریا سۆر هاتبا ئاراسته‌كرن.
پێشتر حووسیان راگه‌هاند، وان كه‌شتیه‌كا په‌ترۆلێ یا بریتانیا ل كه‌نداڤێ عه‌ده‌ن كریه ئارمانج، هێرشا ئه‌مریكا ژى وه‌ك به‌رسڤه‌كێ بوویه بۆ هێرشا ل سه‌ر كه‌شتیا بریتانى.
گرۆپێ ترافیگۆرا كو كه‌شتیا ماڕلین لۆاندا برێڤه‌دبه‌ن بوو ئارمانجا حووسیان، لێ چ زیانن گیانى نه‌بوون و نوكه ئه‌و كه‌شتى به‌ر ب به‌نده‌رێ سه‌لامات دچیت.