سوپایێ پاسدارێن ئیرانێ پشتی هێرشا دوهی یا ل سەر هەولێرێ ژمارەکا بەیانان بەلاڤ کرن و هەڤدژی د بەیانێن وان دا هەیە.
سوپایێ پاسدارێن ئیرانێ، پشتی هێرشێن شڤێدی یێن کرینە سەر هەولێرێ تا بەرێ سپێدەهیا ئەڤرۆ، سێ بەیان بەلاڤ کرن.
د بەیانا ئێکێ دا سوپایێ پاسداران وەسا راگەهاند کو د هێرشان دا بنگەهـ و کۆمبوونێن گرۆپێن "سیخۆری یێن گرۆپێن دژبەری ئیرانێ" کرینە ئارمانج کو مەبەست پێ بنگەهێن حزبێن رۆژهەلاتێ کوردستانێ یە، ژبەر کو پەیڤا "گروهک" بۆ وان گرۆپان ب کار ئینایە، و ئیران وێ پەیڤێ بۆ حزبێن رۆژهەلاتێ کوردستانێ بکار دئینیت.
د بەیانا دویێ دا، سوپایێ پاسداران دەستەواژەیا "کۆمبوونێن گرۆپێن تیرۆرستی یێن دژی ئیرانێ" لادایە و ل جهێ وێ نڤیسیە "گرۆپێن تیرۆرستی یێن نیەت خراب ل دژی ئیرانێ" بووینە ئارمانج. د ڤێ بەیانێ دا سوپایێ پاسداران ب رەنگەکێ ئێکسەر دیار نەکریە چ گرۆپن، ئانکو بتنێ بۆ رەتکرنا بەیانا ئێکێ بوو.
بەیانا سێیێ یا سوپایێ پاسداران هەڤدژی بەیانێن ئێکێ و دویێ یە و تێدا نڤیسیە: مە بنگەهەکێ سەرەکی یێ سیخۆریێ یێ رژێما زایۆنی (مەبەست ئسرائیل و مۆساد) ل هەرێما کوردستانا ئیراقێ کریە ئارمانج و ژناڤ بریە.
زێدەباری کو هەڤدژیەکا دیار د هەرسێ بەیانێن سوپایێ پاسداران دا هەیە، ناڤەرۆکا هەرسێ بەیانان ژی هەڤدژی یە ل گەل یا د راستی دا رویدای کو یا دروست چێبووی، ئارمانجکرنا مالا بازرگانەکێ هەرێما کوردستانێ و تیرۆرکرنا وی و ژمارەکا ئەندامێن خێزانا وی کو زارۆک ژی د ناڤ دانە و ژمارەکا دی یا وەلاتیێن سڤیل یێن هەرێما کوردستانێ یە.