ئاکرێ نیوز
شیره‌تكاره‌كێ سه‌رۆكوه‌زیرێ ئیراقێ پێشبینیكر بهایێ خه‌رجكرنا دۆلارى نزم ببیت و ببیته 135 هزار دینار بۆ هه‌ر 100 دۆلاران.
موزهیر محه‌مه‌د سالح ئه‌ڤرۆ شه‌مبیێ بۆ ئاژانسا ئه‌لغه‌د پرێس یا ئیراقى دیاركر "بهایێ خه‌رجكرنا دۆلارى د بازارێ هه‌ڤته‌ریب د رۆژێن بۆرى دا بلند ببوو ژ به‌ر رویدانێن ئه‌منى و هه‌رێمایه‌تى پشتى كو گه‌هشتبوو 149 هزار دیناران بۆ هه‌ر 100 دۆلاران".
وى شیره‌تكارێ سوودانى گۆت ژى "بهایێ خه‌رجكرنا دۆلارى دێ هێدى هێدى نزم بیت و دێ بیته 135 هزار دینار بۆ 100 دۆلاران هه‌ڤده‌م ل گه‌ل به‌رده‌وامیا سیاسه‌تا حكومه‌تێ و به‌نكا ناڤه‌ندى و رێكخستنا پاره‌داركرنا بازرگانیا ده‌ره‌كى ب ژماره‌یه‌كا دراڤان وه‌كى یورۆ و ده‌رهه‌مێ ئیماراتى".
خۆیا ژى كر "ئیراقێ گه‌له‌ك یه‌ده‌كێن نه‌ختینه‌یى هه‌نه و بهایێ خه‌رجكرنا دۆلارى ل ده‌مه‌كێ نزیك دێ نزم بیت".
به‌رى نوكه ژى، هیشام ره‌كابى شیره‌تكارێ راگه‌هاندنێ یێ سه‌رۆكوه‌زیرێ ئیراقێ دیاركربوو كو د ده‌مه‌كێ نزیك دا بهایێ خه‌رجكرنا دۆلارى دێ گه‌هیته بهایێ فه‌رمى، بهایێ فه‌رمى یێ دۆلارى 1320 دینارن بۆ هه‌ر دۆلاره‌كێ.
ل هه‌یڤا كانوینا ئێكێ یا سالا بۆرى، ده‌سته‌یا به‌نكێن تایبه‌ت یا ئیراقى راگه‌هاند بوو كو رێكارێن حكومه‌تێ و به‌نكا ناڤه‌ندى ب ڤه‌كرنا ژماره‌یێن به‌نكى یێن ئیراقى یێن ده‌ره‌كى ب دراڤێن یورۆ، لیره‌یێ توركى و ده‌رهه‌مێ ئیماراتى دێ بنه ئه‌گه‌رێ كێمكرنا بهایێ خه‌رجكرنا دۆلارى د بازارێ هه‌ڤته‌ریب دا.