ئه‌ڤرۆ دوشه‌مبێ 18-12-2023یێ سپێدێ پرۆسه‌یا ده‌نگدانا گشتى بۆ هه‌لبژارتنێن جڤاتێن پارێزگه‌هان ل ئیراقێ ده‌ستپێكر، زێده‌تر ژ 15 ملیۆن كه‌سان مافێ ده‌نگدانێ هه‌یه و دێ 285 ئه‌ندامێن جڤاتێن پارێزگه‌هان هه‌لبژێرن، ل ده‌مه‌كى نێزیكى شه‌ش هزار كه‌سان خۆ هه‌لبژارتیه.
كۆمسیۆنا بلندا سه‌ربه‌خۆ یا هه‌لبژارتنان گۆت: بۆ جارا ئیكێ یه پشتى سالا 2013ێ هه‌لبژارتنێن جڤاتێن پارێزگه‌هان ل 14 پارێزگه‌هێن ئیراقێ بهێنه كرن و ئێكه‌م جاره ژى پشتى سالا 2005ێ هه‌مان هه‌لبژارتن ل كه‌ركووكێ بهێنه كرن.
جومانا گلای، په‌یڤدارا كۆمسیۆنا بلندا سه‌ربه‌خۆ یا هه‌لبژارتنان دبێژیت: كۆمسیۆنا بلندا سه‌ربه‌خۆ یا هه‌لبژارتنان حه‌فت هزار و 166 ناڤه‌ندێن ده‌نگدانێ ڤه‌كرینه كو ژ 35 هزار و 553 وه‌ستگه‌هان پێك دهێن.
هه‌روه‌سا دیاركر، ژ 285 كورسیێن جڤاتێن پارێزگه‌هان 75 كورسیێن كۆتایان بۆ ژنانه، هه‌روه‌سا 10 كۆتایێن پێكهاتێن كرستیان، شه‌به‌ك، كوردێن ئێزدى، كوردێن فه‌یلى و سائیبه و مه‌نداییانه.
گلایى ئاشكراكریه، د ڤان هه‌لبژارتنان دا پێنج هزار و 904 كه‌سان خۆ به‌ربژار كریه كو 70 ژ وان سه‌ربه‌خۆ نه، 38 هه‌ڤپه‌یمانى و 28 پارتان پشكدارى د هه‌لبژارتنان دا كریه.
خویاكریه، 206 هزار و 429 فه‌رمانبه‌ر سه‌رپه‌رشتیا پرۆسه‌یا ده‌نگدانێ دكه‌ن و 111 هزار و 714 كامیرێن چاڤدێریێ ل بنگه‌هێن ده‌نگدانێ هاتینه دانان.
لگۆڕه‌یى كۆمسیۆنا بلندا سه‌ربه‌خۆ یا هه‌لبژارتنان دیاركریه، ل ده‌مژمێر شه‌شى ئێڤارى پرۆسه‌یا ده‌نگدانێ ب دوماهى دهێت و پشتى 24 ده‌مژمێران ئه‌نجامێن به‌راهیێ دهێنه راگه‌هاندن.