ل دویڤ یاسایا بۆدجەیا بەرگرییا ئەمریکا بۆ سالا بهێت كو ژ نوی کۆنگرێسی پەسندکریە، پێنتاگۆن دێ سیستەمێ بەرگرییا ئاسمانی دەتە هەرێما کوردستانێ و عیراقێ ژبۆ وێ یەكێ د بەرسڤدانا هێرشێن درۆنی و مووشەکی دا بکاربینن، لێ ئەو بۆدجەیا بۆ ڕوویبڕوویبوونا داعش و هەڤكارییا پێشمەرگە، هەسەدە و هێزێن ئەمنی یێن عیراقێ دهێتە تەرخانکرن، کێم كەت.
یاسایا بۆدجەیا بەرگرییا نشتیمانی یا ئەمریکا ل ڕۆژا پێنجشەمبی ژلایێ جڤاتا نوینەران ڤە هاتە پەسەندكرن، د دەقێ یاسایێ دا هاتییە، پێدڤییە هەتا ئێكی شۆاتا سالا بهێت، وەزارەتێن بەرگری و دەرڤە یێن ئەمریکا پلانەکا هەڤپشك دانن ژبۆ دابینکرنا سیستەمێ بەرگرییا ئاسمانی بۆ هەرێما کوردستانێ و عیراقێ داكو د بەرسڤدانا هێرشێن درۆنی و مووشەکی دا بكاربینن.
هەروەسا هێزێن ئەمریکی ل سەر چەوانییا بكارئینانا وی سیستەمێ بەرگرییێ، دێ مەشق و ڕاهێنانان ب پێشمەرگە و هێزێن ئەمنی یێن عیراقێ کەن.
ئەو یاسایە ژلایێ جڤاتا پیران ژی ڤە هاتییە تێپەڕاندن و د نوكەدا چاڤەڕێی ئیمزایا جۆ بایدن، سەرۆکێ ئەمریکایە ژبۆ وێ یەكێ بچیتە دبوارێ بجهئینانێ دا.
ل هەیڤا تەممووزا ئەڤسالە، لیژنەیەکا کۆنگرێسێ ئەمریكا داخواز کر سیستەمێ بەرگرییا ئاسمانی ب هەرێما کوردستانێ و عیراقێ بهێتە دان. ل دویڤ یاسایێ، سالا بهێت پێنتاگۆن دێ 241 ملیۆن و 950 هزار دۆلاران د ڕوویبڕوویبوونا داعشێ ل عیراقێ و هاریكاریكرنا پێشمەرگە و هێزێن ئەمنی یێن عیراقێ خەرجکەت، ئانكو 116 ملیۆن دۆلاران کێمتر ژ وێ بڕا پارەی یێ كو بۆ ئەڤسالە هاتییە دیاركرن.