حكومه‌تا هه‌رێمێ راگه‌هاند كو وێ هه‌مى پێگیریێن خۆ بجهئیناینه و ئه‌و چاڤه‌رێ دكه‌ت حكومه‌تا فیدرالى د سالا 2024 دا كێشه‌یا مووچه‌یێن مووچه‌خۆرێن هه‌رێمێ چاره بكه‌ت و ڤى بابه‌تى تێكه‌لى پرسێن سیاسى نه‌كه‌ت.
ئه‌ڤرۆ كۆمبوونا جڤاتا وه‌زیرێن هه‌رێما كوردستانێ ب سه‌رپه‌رشتیا سه‌رۆكوه‌زیر مه‌سروور بارزانى برێڤه‌چوو.
ل گۆره‌ى به‌یانه‌كا سه‌رۆكێ حكومه‌تێ "د بڕگه‌یا ئێكێ یا كۆمبوونێ دا، دویماهیك پێشهاتێن هه‌ردو دوسیه‌یێن هه‌مواركرنا یاسایا بودجه‌یا فیدرالى و یاسایا نه‌فت و غاز ژ لایێ وه‌زیرێن په‌یوه‌ندیدار ڤه هاته به‌حسكرن".
تێدا هاتیه ژى "وان دوپاتكر كو بزاڤ بۆ هه‌مواركرنا یاسایا بودجه‌یا گشتى یا فیدرالى د به‌رده‌وامن تا كو ره‌وانه‌ى جڤاتا نوینه‌ران بهێته كرن ژ بۆ په‌سه‌ندكرنێ ب ئاراسته‌یێ خه‌رجكرنا شایسته‌یێن دارایى یێن هه‌رێما كوردستانێ و ژ به‌رى هه‌میان ژى شایسته‌یێن مووچه‌خۆرێن هه‌رێمێ، د به‌رانبه‌ر ژى دا هه‌رێما كوردستانێ پێگیریێن خۆ بجهئیناینه و هه‌ردو دیوانێن چاڤدێریا دارایى ئه‌ركێن هویربینیێ و پێداچوونێ یێن خۆ ته‌مامكرینه و هه‌رێما كوردستانێ ژ ڤى روویى ڤه ئاسانكاریێن ته‌مام پێشكێشكرینه".
هه‌ر ل گۆره‌ى به‌یانێ "جڤاتا وه‌زیران دوپاتى ل سه‌ر وێ چه‌ندێ كریه كو مووچه‌یێن مووچه‌خۆرێن هه‌رێمێ، شایسته‌یێن دارایى یێن مووچه‌خۆرانه و چاڤه‌رێ دكه‌ین ژ حكومه‌تا فیدرالى د سالا نوى 2024 دا ڤێ كێشه‌یێ ژ بنه‌ره‌ت چاره‌سه‌ر بكه‌ت و شایسته‌یێن دارایى یێن مووچه‌خۆران تێكه‌لى ناكۆكیێن سیاسى و پێگیریێن دى نه‌كه‌ت و مووچه‌خۆرێن هه‌رێمێ ژى وه‌كى یێن ده‌ڤه‌رێن دى یێن ئیراقێ مووچه‌یێن خۆ د ده‌مێ خۆ دا وه‌ربگرن كو د نوكه دا ب مخابنى ڤه ژ به‌ر نه‌هنارتنا به‌شه بودجه‌یا هه‌رێمێ، مووچه‌یێن سێ هه‌یڤان یێن ئه‌ڤ ساله نه‌هاتینه خه‌رجكرن و بارگڕانیا دارایى و ئابوورى بۆ مووچه‌خۆر و وه‌لاتیێن هه‌رێمێ دروستبوویه كو به‌رپرسیارا حكومه‌تا فیدرالى یه مووچه‌یێن مووچه‌خۆران بۆ حكومه‌تا هه‌رێما كوردستانێ بهنێریت".
"د برگه‌یا دوێ یا كۆمبوونێ دا، مادده و برگه‌یێن ره‌شنڤیسا ئێكێ (رێنمایێن كاركرنا كرێكارێن بیانى ل هه‌رێما كوردستانێ هاتنه به‌حسكرن كو ژ لایێ دارا ره‌شید وه‌زیرێ پلاندانانێ ڤه هاتنه به‌حسكرن و ئاماژه ب وێ چه‌ندێ هاته دان كو ئارمانج ژ ڤان رێنمایان رێكخستنا مووله‌تا كارى و ڤیزه و ئاكنجیبوونه و رێگریه ل هاتنا كرێكارێن بیانى ب شێوه‌یێ نه‌یاسایى و ره‌خساندنا ده‌لیڤه‌یێن كارى یێن پتره بۆ گه‌نجێن هه‌رێما كوردستانێ ب شێوه‌یه‌كێ كو خۆدانێن كۆمپانیان پتر به‌رێ خۆ بده‌نه كرێكار و كارمه‌ندیێن ناڤخۆ، د هه‌مان ده‌م دا، پشتراستیێ بده‌ته مانا كرێكارێن بیانى ژى ل هه‌رێمێ دا كو هه‌رێم مفاى ژ ئه‌زموون و شاره‌زاییا وان وه‌ربگریت"، وه‌كى به‌یانێ ئاماژه‌پێكرى.
خۆیا ژى كریه "عه‌بدوللا حاجى مه‌حموود وه‌زیرێ كاروبارێن شه‌هیدان و ئه‌نفالكریان چه‌ند پێشنیاره‌ك بۆ جڤاتا وه‌زیران دیاركرن كو تایبه‌ت بوون ب زیندانی و گرتیێن سیاسى ل گۆره‌ى شایسته‌یێن یاسایى یێن دیاركرى یێن وان بۆ گره‌نتیكرنا ماف و شایسته‌یێن وان یێن ژ هه‌ژى و رێگرتنێ ل سوودمه‌ندبوونا نه‌ره‌وا ژ مووچه و ئیمتیازاتێن گرتیان و زیندانیێن سیاسى ئه‌ڤ چه‌نده ل گۆره‌ى حوكمێن په‌یره‌وێ ژماره 4 ل سالا 2020 یێ تایبه‌ت ب ئاسانكاریان بۆ بجهئینانا یاسایا چاكسازیێ".
زێده ژى كریه "جڤاتا وه‌زیران ئه‌و پێشنیاره په‌سه‌ندكرن و وه‌زاره‌ت راسپارد كو د بزاڤێن خۆ دا ل گه‌ل نوینه‌رایه‌تیا هه‌رێمێ ل به‌غدا د به‌رده‌وام بن ب پابه‌ندكرنا حكومه‌تا فیدرالى ب دابینكرنا مووچه و ئیمتیازێن زیندانیان و گرتیێن سیاسى ژ لایێ حكومه‌تا فیدرالى ل گۆره‌ى مادده‌یا 132 ژ ده‌ستوورێ ئیراقێ كو ئه‌ڤ به‌رپرسیاریه د ستۆیێ حكومه‌تا ئیراقێ دایه".