سامسۆنگ دێ ئالاڤێ وه‌رگێڕانا ئێكسه‌ر یا زمانى د ده‌مێ په‌یوه‌ندیێن ته‌له‌فۆنى یێن ده‌نگى دا بۆ موبایلا نوى یا گالاكسى به‌رده‌ست كه‌ت ئه‌و ژ ب مفاوه‌رگرتنێ ژ ژیریا ده‌ستكرد.
كۆمپانیا سامسۆنگ دێ د موبایلا نوى یا گالاكسى Galaxy S24 دا كو ل ده‌ستپێكا سالا 2024 دێ كه‌ڤیته د بازاران دا ئالاڤێ وه‌رگێرانا ئێكسه‌ر یا زمانى بۆ په‌یوه‌ندیێن ته‌له‌فۆنى به‌رده‌ست كه‌ت ئه‌و ژى ب رێكا مفاوه‌رگرتنێ ژ ئالاڤێن ژیریا ده‌ستكرد، وه‌كى په‌یڤداره‌كێ سامسۆنگ بۆ فرانس پرێس ئاماژه‌پێكرى.
هه‌ر وى په‌یڤدارى دیاركریه "ئالاڤێ نوى دێ وه‌رگێرانا ئاخفتنا ده‌نگى د ده‌مێ په‌یوه‌ندیا ته‌له‌فۆنى دا هه‌روه‌سا وه‌رگێڕانا تێكستێن نڤیسكى به‌رده‌ست كه‌ت".
تا نوكه ديار نه‌بوویه كا دێ سامسۆنگ ئالاڤێ وه‌رگێڕانێ یێ نوى بۆ چه‌ند زمانان به‌رده‌ست كه‌ت.
ژ به‌ر ژیریا ده‌ستكرد یا د ئامیره‌یێ نوى دا دهێته بكارئینانان، دێ ئالاڤێ وه‌رگێڕانێ كار كه‌ت خۆ ئه‌گه‌ر ئێك ژ هه‌ردو كه‌سێن په‌یوه‌ندیا ته‌له‌فۆنى ئه‌نجامدده‌ن، موبایلا سامسۆنگ بكارنه‌ئینیت ژى.
سامسۆنگ د به‌یانه‌كێ دا دیاركریه "ئاخفتن ل گه‌ل كه‌سه‌كى ب زمانه‌كێ دى ب بكارئینانا ژیریا ده‌ستكرد وه‌كى بكارئینانا وه‌رگێڕانا ئوتوماتیكى یه بۆ زنجیره‌یه‌كێ".
ئه‌ڤ چه‌نده هات پشتى سامسۆنگ شیاى ئالاڤێ ژیریا ده‌ستكرد یێ تایبه‌ت ب خۆ Samsung Gauss دروست بكه‌ت كو دشێت مادده‌یێن زمانى، هێما و وێنه‌یان به‌رهه‌مبینیت.
سامسۆنگ دیار ژى كریه كو ئه‌ڤ ئالاڤه دێ بۆ ژماره‌یه‌كا به‌رفره‌هـ یا به‌رهه‌مێن وێ هێته به‌رده‌ستكرن.