بەرپرسەکێ حکومەتا هەرێما کوردستانێ راگەهاند، هویربینی کرن د لیستا مووچەیدا ژ لایێ تیما هەڤبەشا چاڤدێرییا دارایێ بەردەوامە، دبێژیت: ”د ڤێ هویربینیێدا چ فەرمانبەرەکێ هەرێما کوردستانێ زەرەمەند نابیت، ژبەرکو مە کار لسەر بجهئینانا پرۆسا یاسایا چاکسازیێ د هەمی فەرمانگەهێن حکومەتا هەرێما کوردستانێدا کریە.“
د.عەبدولحەكیم خەسرەو، سەرۆكێ فەرمانگەها هەماهەنگی و دووڤچونێ ل جڤاتا وەزیرێن كوردستانێ راگەهاند: "ئەو لژنا هەڤبەش یا دیوانا چاڤدێرییا داراییا عێراقێ و هەرێما کوردستانێ، کارێن وان بۆ هویربینیا لیستا مووچەی و میلاکاتا یا بەردەوامە و دێ هەمی وەزارەت و خانەنشینی و چاڤدێرییا جڤاکی ژی ڤەگریت."
ئاشکراکر، بۆ دەمێ هەفتیەکێیە هەردوو تیمێن دیوانا چاڤدێرییا داراییا فیدرالی و هەرێما کوردستانێ هویربینیا خۆوەدەست پێکریە، گوت ژی: ”هەردوو تیمێن دیوانا چاڤدێرییا دارایی مژوولێ پرۆسا هویربینیێ نە، هەروەسا دەستنیشانکرنا هژمارا مووچەخۆرێن هەرێما کوردستانێ و ئەو مووچێن کو پێتڤیە هەیڤانە بۆ هەرێما کوردستانێ بهێتە هنارتن."
د.عەبدولحەكیم خەسرەو، دبێژیت: " وڵاتیێن هەرێما کوردستانێ وەکی هەمی دەڤەرێن دن یێن عێراقێ، دێ ژ بودجا گشتییا فیدرالیدا پشک هەبیت و بودجا گشتی ب ساناهی بگەهیتە دەست مووچەخۆرێن هەرێما کوردستانێ، بۆ هندێ دا کاریگەری لسەر ژیانا رۆژانە یا خەڵکی نەبیت.“
گووت ژی: "د ساڵا 2022دا هویربینی بۆ لیستا مووچەخۆرێن هەرێما کوردستانێ هاتبووکرن، نوکە دووبارە هویربینی دهێتەکرن، هەروەسا ئەو هویربینیا، کۆ د ساڵا 2022دا هاتبووکرن، جهێ باوەریا دیوانا چاڤدێرییا داراییا فیدڕالی بوو، لەورا د یاسایا بودجا فیدرالیدا هاتە جێگیر کرن.“
سەرۆكێ فەرمانگەها هەماهەنگی و دوڤچونێ ل جڤاتا وەزیرێن كوردستانێ گوت، حکومەتا هەرێما کوردستانێ داخاز ژ حکومەتا عێراقا فیدرال کر، کۆ مووچە ژ ئاریشێن سیاسی بهێتە جوداکرن.
د.عەبدولحەكیم خەسرەو، پشتراستی دایە مووچەخۆران و گوت: "دڤێ هویربینیێدا هیچ فەرمانبەرەکێ هەرێما کوردستانێ زەرەرمەند نابیت، ژبەرکو مە کار لسەر بجهئینانا پڕۆسا یاسایا چاکسازیێ د هەمی فەرمانگەهێن حکومەتا هەرێما کوردستانێدا کریە، پرۆسا هویربینیێ ژی پڕۆسەکا بەردەوامە و ساڵانە دهێتە ئەنجامدان."
بەحسا وێ ئێکێ ژی کر: " مە پرۆسا بایۆمەتری بۆ هەمی مووچەخۆرێن هەرێما کوردستانێ ئەنجام دایە، ئەڤە ژی خاڵەکا گرنگە کۆ وڵاتیێن هەرێما کوردستانێ تەنێ ئێک جار دێ مفادار بن ژ بودجا گشتی و دوو مووچەیی ژی نەمینیت.“