سه‌رۆكێ باژێرڤانییا قه‌زایا به‌رده‌ره‌ش دیاركر، شه‌ش پرۆژه‌یێن خزمه‌تگوزارى ب كوژمێ حه‌فت ملیار و 500 ملیۆن دیناران ل ناڤه‌ندا قه‌زایێ دقووناغا بجهئینانێدانه، ب تمامكرنا وان پرۆژه‌یان 60%ێ یا جادێن قه‌زایێ دێ هێته قێركرن و كۆنكریت كرن.
سیروان حه‌سه‌ن سه‌رۆكێ باژێرڤانییا به‌رده‌ره‌شێ ئاشكراكر، ب كوژمێ حه‌فت ملیار و 500 ملیۆن دیناران پرۆژه‌یێن خزمه‌تگوزارى یێن ئاڤرێژ، دروستكرنا شۆسته‌یان و قێركرنا تاخێن، برایه‌تى، خێله‌ك، به‌رده‌ره‌شا بچووك، ئه‌یلول و پرۆژه‌یێ سایدێ دووێ یێ مه‌فره‌قا خێله‌ك بۆ ناڤا باژێرى د قووناغا بجهئینانێدانه، رێژه‌یا بجهئینانێ دوان پرۆژه‌یاندا یا ژێك جۆدایه و دناڤبه‌را 20 بۆ 80%ێدانه.
سه‌رۆكێ باژێرڤانییا به‌رده‌ره‌شێ ئاماژه ب هندێ دا، ئێك ژ پرۆژه‌یێن گرنگ یێن كو نوكه د بوارێ بجهئینانێدایه، پرۆژه‌یێ ئاڤرێژ و كۆنكریتكرنا ده‌ڤه‌را پیشه‌سازییا نوویه كو 1.5 ملیار دینار بۆ تمامكرنا وى پرۆژه‌ى هاتینه ته‌رخانكرن و ئه‌و به‌رده‌وام دووڤچوونا پرۆژه‌ى دكه‌ن، جهێ پیشه‌سازییا كه‌ڤن ژى دپلاندایه ل سالا بهێت ببیته پاركه‌كا گشتى داكو رێژه‌یا كه‌سكاتییێ ل قه‌زایێ زێده‌بكه‌ت.
سیروان حه‌سه‌نى ئاماژه ب هندێ ژى دا، ره‌زامه‌ندى ل سه‌ر ته‌رخانكرنا چار ملیار دینارێن دى بۆ بجهئینانا چه‌ند پرۆژه‌یێن خزمه‌تگوزارى ل سنۆرێ قه‌زایا به‌رده‌ره‌ش هاتییه دان.