سه‌رۆكێ حكومه‌تا هه‌رێما كوردستانێ د كۆنفرانسێ بانكیێ ئیراقێ دا ل هه‌ولێرێ راگه‌هاند، دانانا سیسته‌مه‌كێ بهێز یێ بانكى ئێك ژ ئارمانجێن كابینه‌یا 9ێ یه، گۆت ژى، تا دو سالێن دى پاره‌داركرن ل هه‌رێمێ دێ هێته ئه‌لكترۆنیكرن، هه‌روه‌سا تا دویماهیا سالا بهێت ملیۆنه‌كا مووچه‌خۆرێن هه‌رێمێ دێ بنه خودان هژمارا خۆیا بانكى.
سپێده‌هیا ئه‌ڤرۆ ل ده‌مژمێر 10ى سپێدێ ب ئاماده‌بوونا مه‌سروور بارزانى، سه‌رۆكێ حكومه‌تا هه‌رێما كوردستانێ كۆنفرانسێ سالانه یێ بانكى یێ ئیراقێ ل هه‌رێما كوردستانێ هاته گرێدان، هژماره‌كا بانكێن ئه‌هلى یێن ئیراقێ و وه‌لاتێن عه‌ره‌بى پشكدار بوون تێدا، ئارمانج ژ كۆنفرانسى پێشڤه‌برنا كارێ بانكى یه ل هه‌رێما كوردستانێ و ئیراقێ.
د گۆتاره‌كێ دا سه‌رۆكێ حكومه‌تا هه‌رێما كوردستانێ رژدى ل بجهئینانا پرۆژه‌یێ هژمارا من یا بانكى كر و راگه‌هاند، دانانا سیسته‌مه‌كێ بهێز یێ بانكى ئێك ژ ئارمانجێن كابینه‌یا 9ێ یه، دیاركر ژى، 5 بانك پشكدارن د پرۆژه‌یێ هژمارا من دا و هه‌ماهه‌نگى دگه‌ل ئیراقێ ژى دهێته كرن.
مه‌سروور بارزانى باس ل پلانێن حكومه‌تێ و چاكسازیێن د كه‌رتێ بانكى دا كر و راگه‌هاند، د ماوه‌یێ دو سالێن بهێن دا، خانه‌نشینێن هه‌رێمێ ئێدى نه‌چار نابن لبه‌ر گه‌رما هاڤینێ و سه‌رما زڤستانێ ل سرا وه‌رگرتنا موچه‌ى راوه‌ستن و ل رۆژه‌كا دیاركرى پارێ وان دێ چیته سه‌ر حسابا وان یا بانكى. هه‌روه‌سا بازرگان نه‌چار نابن پاره‌یه‌كێ مه‌زن ل ده‌ڤ خۆ هه‌لگرن و دێ شێن ب رێكا ئۆنلاین چاڤدێریا حسابا خۆ یا بانكى بكه‌ن، یێن دخوازن پاره‌ى بۆ پرۆژه‌یێن بچویك وه‌ر‌گرن دێ پرۆسه ب سانه‌هى بیت، یێن پاره‌ی بۆ كه‌سوكارێن خۆ دهنێرن ژى ئێدى پێدڤى ب نڤیسینگه‌هێن حه‌واله‌كرنێ نابن.
بارزانى دا زانین ژى، تا دویماهیا ئه‌ڤساله هزاران فه‌رمانبه‌رێن كه‌رتێ گشتى دێ حسابا بانكى بۆ هێـته چێكرن و تا دویماهیا سالا بهێت ژى ملیۆنه‌كا مووچه‌خۆرێن هه‌رێمێ دێ حسابا بانكى بۆ هێته چێكرن.
سه‌رۆكێ حكومه‌تا هه‌رێما كوردستانێ گۆت ژى، ئارمانجا وان دروستبوونا هه‌ڤڕكیه‌كا دروسته دناڤبه‌را بانكێن هه‌رێمێ دا، وه‌لاتى ژى ئازاد بن كیژ بانكێ هه‌لبژێن ل گۆره‌ى پێشكه‌فتنێ و پێشكێشكرنا خزمه‌تگوزاریێن بله‌زتر.