ئاکرێ نیوز:
ژماره‌یه‌كا بكڕێن ئایفۆن 15 پرۆ و ئایفۆن 15 پرۆ ماكس گازنده ژ وێ چه‌ندێ كرن كو پشتى ده‌مه‌كێ كورت ژ بكارهینانێ گوهۆڕین د رۆخسارێ موبایلێن وان دا رویدایه و شوینتبلێن وان دمیننه ل سه‌ر موبایلێ.
چارچووڤه و چینا ده‌ره‌كى یا ئایفۆن 15 ژ تیتانیۆمى هاتیه دروستكرن و ژماره‌یه‌كا بكارهینه‌ران پشتى كڕینێ گازنده ژ وێ چه‌ندێ كرن كو شوینتبلێن وان دمیننه ل سه‌ر موبایلێ و ب تایبه‌ت ل نزیكى دۆگمه‌یێن ل ره‌خێن موبایلێ و هۆسا دیمه‌نێ وێ پاقژ دیار ناكه‌ت.
ژماره‌یه‌كا بكارهینه‌رێن ئایفۆن 15 پرۆ و پرۆ ماكس وێنه‌یێن جودا جودا د سوشیال میدیایێ دا ل دۆر ڤى حاله‌تى به‌لاڤكرینه.
كۆمپانیا ئه‌پل د به‌یانه‌كێ د مالپه‌رێ خۆ یێ فه‌رمى دا به‌رسڤا وان بكارهینه‌ران دایه و دیاركریه "دیاربوونا شوینتبلان ل سه‌ر چارچووڤه‌یێ تیتانیۆمى یێ موبایلان ره‌نگه حاله‌ته‌كێ ده‌مكى بیت ژ به‌ر زه‌یتێن ل سه‌ر له‌شێ بكارهینه‌ران".
ديار ژى كریه "ئه‌ڤ حاله‌ته به‌رده‌وام نابیت، بكارهینه‌ر دشێن جاره‌كا دى رۆخسارێ موبایلێن خۆ بزڤڕینن ئه‌و ژى ب رێكا پاقژكرنا موبایلێ ب پارچه‌یه‌كا قۆماشى یا نه‌رم و پیچه‌كێ ته‌ڕ".
بۆ جارا ئێكێ يه كۆمپانیا ئه‌پل هه‌یكه‌لێ تیتانیۆمى بۆ دروستكرنا موبایلێن خۆ بكاردئینیت ئه‌و ژى د ئایفۆن 15 پرۆ و پرۆ ماكس دا.
تیتانیۆم كانزایه‌كێ ب هێزه و د پیشه‌سازیێن وه‌كى فڕۆكه‌ڤانیێ دا دهێته بكارئینان.
هه‌ڤده‌م ئه‌ڤ ئاریشه‌یه د موبایلێن ئایفۆن 15 و ئایفۆن 15 پله‌س دا روینه‌دایه چونكى هه‌یكه‌لێ وان ژ ئه‌له‌مینیۆمى هاتیه دروستكرن.