سه‌رۆكێ هه‌رێما كوردستانێ و سه‌رۆكوه‌زیرێن هه‌رێمێ په‌یامێن جودا ب هه‌لكه‌فتا دامه‌زراندنا ئێكه‌تیا زانایێن ئاینێ ئیسلامێ یا كوردستانێ بەلاڤكرن.
د په‌یامه‌كێ دا سه‌رۆكێ هه‌رێما كوردستانێ، نێچیرڤان بارزانى گۆت: رۆل و خه‌بات و تێكۆشینا مامۆستا و زانایێن ئۆلى و ئێكه‌تیا زانایێن ئاینێ ئیسلامێ ل سه‌رده‌مێ شۆڕش و به‌رهنگاربوونا سته‌مكاریێ دا، هه‌روه‌سا ئاماده‌یى و كارتێكرن ل نۆكه‌یا ئازادى و كۆمه‌لگه‌ها كوردستانێ و بزاڤا وان ژبۆ پاراستنا مافێن زانایێن ئۆلى بلند دنرخینین.
سه‌رۆك نێچیرڤانى دیاردكه‌ت، مامۆستا و زانایێن ئۆلى رۆله‌كێ كارا ب گیانێ ته‌بایى و لێبۆرین و پێكڤه‌ژیانا ئاشتیانه، به‌رهنگاربوونا گۆتارا رق و تیرۆرێ و توندكاریێ و پاراستنا بهایێن جوانێن كۆمه‌لگه‌ها كوردستانێ د گێڕن و ئه‌ركه‌كێ پیرۆز د گه‌هاندنا په‌یاما چاكخوازى و میانڕه‌وى و نشتیمان په‌روه‌ریێ بجهـ دئینن، ژبۆ ڤێ یه‌كێ ژى سه‌رۆكێ هه‌ریمێ ده‌ستخۆشى ل وان كر.
ژ ئالیه‌كێ دى ڤه د په‌یامه‌كێ دا سه‌رۆكێ حكومه‌تا هه‌رێما كوردستانێ هیڤى خواست ئێكه‌تیا زانایێن ئۆلا ئیسلامێ به‌رده‌مام بیت د ئه‌ركێ خۆ یێ پیرۆز دا بۆ گه‌شه‌پێدانا كلتۆرى و میانڕه‌ویێ و پێكڤه‌ژیانا ئاشتیانه د ناڤبه‌را پێكهاتێن جودایێن كوردستانێ دا و به‌رهنگاربوونا هزڕا توندڕێ و پاراستنا ئاشتیا كۆمه‌لایه‌تى و داكۆكیكرن د پرسا نشتیمانى و مافێن ره‌وایێن گه‌لێ كوردستانێ دا