ب هەلكەفتا شێستەمین سالڤەگەرا دامەزراندنا ئێزگێ دەنگێ كوردستان، سەرۆك بارزانی پەیامەكا پیرۆزباهییێ بەلاڤكر.
دەقێ پەیاما سەرۆك بارزانی:
ب ناڤێ خۆدێ مەزن و دلۆڤان
ب هەلكەفتا شێستەمین سالڤەگەرا دامەزراندنا ئێزگێ دەنگێ كوردستان، پیرۆزباهییێ ل ڕێڤەبەر و ستافێ ئێزگێ دەنگێ كوردستان و هەموو وان خەباتكاران دكەم یێن كو ل قۆناغێن بووری د ئێزگێ دەنگێ كوردستان دا دەنگێ شۆڕەش و خەباتا گەلێ كوردستانێ بووینە.
دامەزراندنا ئێزگێ دەنگێ كوردستان، شۆڕەش و وەچەرخانەك بوو د گەهاندنا دەنگێ ڕەوا یێ گەلێ مە دا و د هەمان دەم دا بوویە ژێدەرێ ئیلهام و بەرچاڤ ڕوونییێ بۆ شۆڕەشگێران و پێشمەرگێن قارەمان و ڕێكخستنێن حزبی و هەموو چین و تەخێن گەلێ كوردستانێ و ڕۆلەكێ كارتێكەر هەبوو د گەهاندنا پەیاما شۆڕەشێ دا بۆ سەرانسەری كوردستانێ و دەڤەرێ و جیهانێ.
ڕۆلێ ئێزگێ تێكۆشەر یێ دەنگێ كوردستان د قۆناغێن جوداجودا یێن شۆڕەشێ دا هەردەم دێ د بیرەوەرییێ دا مینیت. هیڤیدارم نوكە ژی ب نەفەسەكا نوی و ب سوود وەرگرتنێ ژ تەكنینك و شێوازێن نوی بەردەوام بیت ژ بەرگریكرنێ ل مافێن خەلكێ كورستانێ و پاراستنا ڕەسەنایەتی و كەلتوور و پێكڤەژیان و نشتیمانپەروەرییێ دناڤ خەلكێ كوردستانێ دا.