مەسرور بارزانی، سەرۆكێ حكومەتا هەرێما کوردستانێ پەیامەك ب هەلكەفتا 62 سالییا سەرهلدانا شۆڕەشا ئیلۆنێ بەلاڤكر؛
دەقێ پەیاما مەسرور بارزانی:
د شێست و دوو سالییا سەرهلدانا شۆڕەشا مەزن یا ئیلۆنێ، ب ڕێز و پێزانینڤە سالڤەگەڕا هەمی تێكۆشەر و پێشمەرگەیێن قه‌هرەمان و گشت پشكدارێن ئەڤێ شۆرەشا گشتگیر و سەرانسەری كوردستانێ دكەین.
شۆڕەشا ئیلۆنێ، مەزنترین شۆڕەشا گەلێ کوردستانێ بوو کو هەمی پێکهاتەیێن جودا یێن گەلێ کوردستانێ ل ژێر سەرکردایەتییا ڕێبەرێ نشتیمانێ مە جەنابێ بارزانیێ نەمر، ل پێناڤ ئارمانجا بلند یا هەڤبەشدا پشكداری تێدا كر و چەندین داستانێن سەرکەفتنێ تێدا تۆماركرن و سەروەری و دەستکەفتنێن گرنگ بۆ گەلێ کوردستانێ ب دەستڤە ئینان. د ئەڤێ ڕۆژگارا دژواردا بەرخودان و خۆڕاگری و قه‌هرەمانییا پێشمەرگەی و وەلاتییێن کوردستانێ ب گشتی، د جیهانێدا دەنگ ڤە دایە و هەتا نوكە نە تنێ ئازادیخوازێن كوردستانێ، بەلكی ئازادیخوازێن هەمی جیهانێ، ب ڕێزڤە شۆڕەشا ئیلۆنێ یا گەلێ كوردستانێ دبینن.
بیرئینانا شۆڕەشا مەزن یا ئیلۆنێ، پێدڤییە ببیتە هاندەرەكێ زێدەتر بۆ هەمییان هەتا پێداگیر بن ل سەر ب دەستڤەئینانا مافێن مە یێن دەستووری ب خەمخۆری و دلسۆزی ڤە، هەمی ئەو دەستکەفتێن مە یێن نشتیمانی ب پارێزین کو بەرهەمێ ڕەنج و خەبات و قوربانیدان و شۆڕەش و سەرهلدانێن گەلێ کورستانێ، ب تایبەتی شۆڕەشا ئیلۆنێ كە ئێكە ژ دەستكەفتێن دیرۆكی، ڕێككەڤتنا یازدەیێ ئادارا 1970 دەمێ حکومەتا وی دەمی یا عیراقێ نەچاركر دان ب پشكەك ژ مافێن گەلێ كوردستانێ بدەن.
شۆڕەشا ئیلۆنێ، بۆ هەمی دوژمنان و نەیارێن كوردستانێ سەلماند، كو گەلێ كوردستانێ ڕێیا نەڕاوەستییان و سەرفرازییا گرتەبەر نە خۆڕادەستكرن.
سلاڤ بۆ گیانێ پاکێ شەهیدێن شۆڕەشا ئیلۆنێ و هەمی شەهیدێن کوردستان.
مەسرور بارزانی
سەرۆکێ حکومەتا هەرێما کوردستانێ
2023/9/11