د هه‌شت سالاندا 368 كه‌س ل هه‌رێما كوردستانێ ب تۆپباران و بۆردوومانێن توركیا و ئیرانێ گیانێ خوه ژ ده‌ستداینه و برینداربووینه، ئه‌ڤ ساله ژى هێرش ل سه‌ر 87 جهێن هه‌رێما كوردستانێ هاتییه كرن، كو ژ ئه‌گه‌رێ وان هێرشان، هه‌شت وه‌لاتییان گیانێ خوه ژ ده‌ستدا و پێنجێن دی ژى برینداربووینه.
كامه‌ران ئوسمان ئه‌ندامێ تیما كوردستان ل رێكخراوا ( CPT ) یا ئه‌مریكى ل عیراقێ راگه‌هاند، ژ هه‌یڤا ته‌باخا سالا 2015ێ هه‌تا ئه‌ڤرۆ، ژ ئه‌گه‌رێ هێرشێن توركیا و ئیرانێ 147 كه‌س ل هه‌رێما كوردستانێ شه‌هیدبوون و 221 كه‌سێن دى ژى برینداربوو، ب تنێ د ئه‌ڤ ساله‌دا هه‌شت كه‌سان ژ ئه‌گه‌رێ وان هێرشان گیانێ خوه ژ ده‌ستدا و پێنج كه‌سێن دى ژى برینداربوون.
كامه‌ران ئوسمانى سه‌باره‌ت بزاڤێن وه‌رگرتنا ماف و ئیمتیازاتان بۆ كه‌سوكارێن ئه‌وان كه‌سێن ژ ئه‌گه‌رێ تۆپباران و بۆردوومانێن توركیا و ئیرانێ گیانێ خوه ژ ده‌ستداین دگه‌ل ئه‌وێن برینداربووین دیاركر، ئه‌و مژوولى پرۆژه‌یه‌كى نه بۆ ئاماده‌كرنا به‌لگه‌نامه‌یێن وان كه‌سێن شه‌هیدبووین و برینداربووین، بریاره ل هه‌یڤا چریا دووێ یا ئه‌ڤ ساله سه‌ره‌دانا جڤاتا وه‌زیرێن عیراقێ بكه‌ن و به‌لگه‌نامه‌یان راده‌ست بكه‌ن.
ئاماژه ب هندێ ژى دا، وان دڤێت عیراقێ ئه‌وان شه‌هیدان ب شه‌هیدێن نیشتیمانى بزانن و ب هژمێریت، كه‌سوكارێن وان قه‌ره‌بوو بكه‌ت، ئه‌وێن بووینه كێم ئه‌ندام ژى ب كێم ئه‌ندام ب هژمێریت قه‌ره‌بوویا وان بكه‌ت.