لێكۆلینه‌كا ساخله‌میێ یا نوى ئاماژه دایه مفایێن كه‌نیێ و ته‌ماشه‌كرنا كۆمێدیایێ ژ بۆ ساخله‌میا دلى و بۆریێن خوینێ.
لێكۆلینه‌كا به‌رازیلى ئاشكرا كریه كو چاره‌سه‌ركرنا ب كه‌نیێ دبیته ئه‌گه‌رێ باشتربوونا ساخله‌میا شانه‌یان دناڤ دلى دا و زێده‌بوونا هاتنوچوونا ئوكسجینێ د له‌شى دا.
پرۆفیسۆر ماركۆ ساڤى ژ نه‌خۆشخانه‌یا كلینیكاس دى پۆرتۆ ئه‌لێگرى ل به‌رازیلێ د ڤى ده‌رباره‌ى دا دبێژیت "لێكۆلینا مه ئاشكرا كریه كو چاره‌سه‌ریا ب كه‌نیێ شیانێن كاركرنا سیسته‌مێ دلى و بۆریێن خوینێ باشتر دكه‌ت".
ئه‌ڤه ب ئێكه‌م لێكۆلین دهێته هژمارتن كو په‌یوه‌ندیێ دناڤبه‌را چاره‌سه‌ریا ب كه‌نیێ و باشتربوونا ساخله‌میا تووشبوویێن نه‌خۆشیێن دلى دا ئاشكرا دكه‌ت.
ئه‌نجامێن لێكۆلینێ د كۆمبوونا سالانه یا ده‌سته‌یا ئه‌ورۆپى یا نه‌خۆشیێن دلى دا ل ئه‌مستردام هاتبوونه نیشاندان.
لێكۆلین ل سه‌ر 26 كه‌سێن تێكرایێ ژیێ وان 64 سال هاتبوو ئه‌نجامدان كو هه‌می تووشبوویێن نه‌خۆشیا تاجى یا خوینبه‌ران بوون كو ژ ئه‌نجامێ خڕڤه‌بوونا به‌رمایكان د دیوارێن بۆریێن خوینێ دا یێن خوینێ بۆ دلى ڤه‌دگوهێزێن رویدده‌ت.
د ده‌مێ سێ هه‌یڤان دا، ژ نیڤه‌ك ژ وان پشكداران هاته داخوازكرن كو حه‌فتیانه ته‌ماشه‌ى به‌رنامه‌یێن كۆمێدى بۆ ده‌مژمێره‌كێ بكه‌ن و ژ یێن دى هاتبوو خواستن كو ته‌ماشه‌ى بابه‌تێن سیاسى و دێكیۆمێنتارى بكه‌ن.
پشتى لێكۆلینێ، گرۆپێ ته‌ماشه‌ى كۆمێدیایێ كرى رێژه‌یا هاتنوچوونا ئوكسجینێ د له‌شێ وان دا ب رێژه‌یا 10% باشتر بوو.
پرۆفیسۆر ساڤى ئاماژه ب وێ چه‌ندێ ژى كر كو چاره‌سه‌ریا ب كه‌نیێ د شیان دایه مه‌ترسیا تووشبوونێ ب جه‌لته‌یێن دلى و مه‌ژى كێم بكه‌ت.