ژماره‌یه‌كا بكارهینه‌رێن ئایفۆن 14 پرۆ گازنده‌یان ژ لاوازبوونا ئاستێ پاتریێ پشتى كێمتر ژ ساله‌كێ ل سه‌ر به‌رده‌ستبوونا وێ دكه‌ن.
ئه‌پل ساخله‌تێ پشتراستبوونێ ژ ره‌وشا پاتریێ Battery Health ل سالا 2018ێ د موبایلێن ئایفۆن دا زێده كربوو پشتى تۆمه‌تا هێواشبوونا ب ئه‌نقه‌ست یا موبایلی ل ده‌مێ لاوازبوونا پاتریێ ئاراسته‌ى وێ هاتیه كرن.
موبایلێن ئایفۆن پاتریێن ژ جۆرێ Lithium بكاردئینن یێن كو ل گه‌ل بۆرینا ده‌مى و زێده‌بوونا جارێن بارگاویكرنا موبایلێ ئاستێ وێ لاوازتر دبیت.
مالپه‌رێ 9to5mac یێ تایبه‌تمه‌ند ب ده‌نگوباسێن ئه‌پل دیاركریه "ژماره‌یه‌كا مه‌زن ژ بكارهینه‌رێن ئایفۆن 14 پرۆ سكرینشووت به‌لاڤكریه و تێدا پاشڤه‌چوونا ئاستێ پاتریێن موبایلێن وان دیار دبیت".
كۆمپانیا ئه‌پل به‌رى نوكه دیاركریه كو پاتریێن ئایفۆنان وه‌سا هاتینه دروستكرن كو 80% ژ ئاستێ خۆ یێ ره‌سه‌ن پشتى 500 جارێن بارگاویكرنێ بپارێزن.
ل گۆره‌ى هنده‌ك راپۆرتان، ره‌نگه پاشڤه‌چوونا ئاستێ پاتریێن ئایفۆن 14 پرۆ ژ به‌ر هنده‌ك ساخله‌تێن وێ موبایلێ بن وه‌كى ئاستێ رۆناهیێ یێ بلند یێ شاشه‌یێ.
تا نوكه ئه‌پل ب فه‌رمى به‌رسڤا گازنده‌یێن بكارهینه‌ران ل دۆر پاتریا ئایفۆن 14 پرۆ نه‌دایه.
ب شێوه‌یه‌كێ گشتى، ئه‌پل شیره‌تێ ل بكارهینه‌ران دكه‌ت كو پاتریێن موبایلێن خۆ بگوهۆڕن ده‌مێ ئاستێ وێ ژ 80% كێمتر دبیت.