پشتى پلاتفۆرما ئینستاگرامى یا گرێداى كۆمپانیا مێتا ب فه‌رمى ئه‌پلیكه‌یشنێ خۆ یێ نوى یێ ب ناڤێ Threads كو تا رادده‌یه‌كێ مه‌زن هه‌ڤشێوه‌ى تویته‌رى یه به‌رده‌ستكرى، گه‌له‌ك كه‌س پرسیارا جوداهیا وێ ل گه‌ل تویته‌رى دكه‌ن.
بكارهینه‌رێن ئینستاگرامى دشێن ئه‌كاونتێ Threads بۆ خۆ دروست بكه‌ن و هه‌مى فه‌له‌وه‌رزێن خۆ د ئینستاگرامى دا ئێكسه‌ر بۆ وێرێ ژى زێده بكه‌ن، یان ژى هنده‌ك ژ وان یان ژى كه‌سێ ژ وان بۆ Threads نه زێده كه‌ن.
رۆژنامه‌یا وول ستریت جۆرنال هه‌ڤبه‌ركرنه‌ك دناڤبه‌را وان هه‌ردو ئه‌پلیكه‌یشنان دا كریه و دیاركریه كو د هنده‌ك خالان دا هه‌ردو ئه‌پلیكه‌یشن د هه‌ڤشێوه‌نه وه‌كى به‌لاڤكرنا پۆستان، تێكستان، وێنه‌یان، لینكان و گرته‌یێن ڤیدیۆیى و هه‌روه‌سا ڤرێكرنا نامه‌یان.
لێ ژماره‌یه‌كا خالێن جوداهیێ دناڤبه‌را Threads و تویته‌رى دا هه‌نه وه‌كى:
1. پێدڤیه بكارهینه‌رێ Threads ئه‌كاونت د تۆرا ئینستاگرامى دا هه‌بیت دا كو بشێت بكاربینیت، لێ بكارهینه‌رێ تویته‌رى نه‌یێ گرێداى چ ئه‌پلیكه‌یشن و پلاتفۆرمێن دى یه.
2. بكارهینه‌ر نه‌شێت گوهۆڕینان د پۆستێن خۆ د Threads دا پشتى به‌لاڤكرنێ بكه‌ت، به‌روڤاژى تویته‌رى.
3. ژماره‌یا پیتان د پۆستێن Threads دا پێدڤیه ژ 500 پیتان ده‌رباز نه‌بیت، ل ده‌مه‌كێ ل تویته‌رى پێدڤیه ژ 280 پیتان نه‌بۆریت ژ بلى تویتێن پشكدارێن تویته‌ر بلو.
4. د Threads دا بكارهینه‌ر دشێت ل ئه‌كاونتێن دى د خانه‌یا Search دا بگه‌ڕیت لێ نه‌شێت د په‌یڤێن دناڤ پۆستان دا بگه‌ریت، به‌روڤاژى تویته‌رى.
5. بكارهینه‌رێ Threads نه‌شێت نامه‌یێن ئێكسه‌ر ڤرێبكه‌ت به‌لكو پێدڤیه بۆ ڤرێكرنا نامه‌یان بڤه‌گه‌ڕیته ئینستاگرامى.
6. تا نوكه ریكلام د Threads دا نینن به‌روڤاژى تویته‌رى.
7. بكارهینه‌رێ تویته‌رى ب رێكا ئاراسته‌یان Trends دشێت گه‌رمترین بابه‌تان و بابه‌تێن جهێ گرنگیپێدانا خۆ ببینیت لێ د Threads دا رێكا ئێكانه یا دیتنا هه‌مى بابه‌تان ئه‌وه دویڤچوونا لاپه‌رێ سه‌ره‌كى بكه‌ت.
8. Threads ساخله‌تێ ڤه‌شارتنا ژماره‌یا لایكێن ل سه‌ر پۆستان به‌رده‌ست دكه‌ت، به‌روڤاژى تویته‌رى.
9. Threads ساخله‌تێ پاراستن و سه‌یڤیكرنا ره‌شنڤیسا پۆستێن هاتینه نڤیسین و نه‌هاتینه به‌لاڤكرن به‌رده‌ست نه‌كریه، ل ده‌مه‌كێ ئه‌ڤ ساخله‌ته د تویته‌رى دا هه‌یه.
10. د Threads دا بكارهینه‌ر نه‌شێت لایكێن كه‌سان ل سه‌ر پۆستێن كه‌سێن دى ببینن، به‌روڤاژى تویته‌رى.
Threads تا نوكه ل پتر ژ 100 وه‌لاتان هاتیه به‌رده‌ستكرن، لێ ل وه‌لاتێن ئێكه‌تیا ئه‌ورۆپى ژ به‌ر رێكارێن رێكخستنێ به‌رده‌ستكرنا وێ هاتیه پاشئێخستن كو كۆمپانیێن ته‌كنولوژى دكه‌ڤنه ل بن ده‌ستهه‌لاتا یاسایا بازارێن دیجیتال یا نوى.
ل گۆره‌ى ئێك ژ بڕگه‌یێن وێ یاسایێ، سنوورداریه‌ك ژ بۆ ڤه‌گوهاستنا داتایان ژ به‌رهه‌مه‌كێ بۆ ئێكێ دى هه‌یه وه‌كى نوكه ژ ئینستاگرامى بۆ Threads.