كۆمبوونا سه‌رۆكێ هه‌رێما كوردستانێ ل گه‌ل وه‌زیرێ به‌رگریێ یێ فره‌نسا ل هه‌ولێرێ به‌رى ده‌مه‌كێ كێم ب دویماهیك هات و سه‌رۆكێ هه‌رێمێ راگه‌هاند كو كۆمبوونه‌كا باشبوو.
كۆمبوونا سه‌رۆك نێچیرڤان بارزانى ل گه‌ل سیباستیان لوكونیۆ وه‌زیرێ به‌رگریێ یێ فره‌نسا به‌رى ده‌مه‌كێ كێم ب دویماهیك هات كو تێدا ژماره‌یه‌كا بابه‌تێن گرێداى ره‌وشا ئیراقێ و هه‌رێما كوردستانێ و بابه‌تێن نێڤده‌وله‌تى هاتنه به‌حسكرن.
پشتى كۆمبوونێ سه‌رۆكێ هه‌رێما كوردستانێ و وه‌زیرێ به‌رگریێ یێ فره‌نسا پرێس كۆنفرانسه‌ك گرێدان و تێدا سه‌رۆكێ هه‌رێما كوردستانێ داخواز كر كو پشته‌ڤانى و هاریكاریێن هه‌ڤپه‌یمانیا نێڤده‌وله‌تى بۆ هه‌رێما كوردستانێ د به‌رده‌وام بن.
سه‌رۆك نێچیرڤان بارزانى دیار ژى كر؛ سه‌ره‌دانا وه‌زیرێ به‌رگریێ یێ فره‌نسا په‌یامه‌كا گرنگ یا به‌رده‌وامى و گرنگیا دوستایه‌تیا فره‌نسایه ل گه‌ل ئیراقێ و هه‌رێما كوردستانێ.
سه‌رۆكێ هه‌رێمێ راگه‌هاند ژى "مه كۆمبوونه‌كا باش هه‌بوو، مه به‌حس ل شه‌ڕێ دژى داعش و به‌رهنگاریا تیرۆرێ كر و ئه‌م هه‌ردولا د هه‌ڤرا بووین كو داعش هێشتا مه‌ترسیه ل سه‌ر سه‌قامگیریا ئیراقێ و ده‌ڤه‌رێ".
سه‌رۆك نێچیرڤان بارزانى دیار ژى كر؛ پێدڤیه هه‌ڤكارى و پشته‌ڤانیا نێڤده‌وله‌تى و فره‌نسا بۆ ئیراقێ و هه‌رێما كوردستانێ به‌رده‌وام بیت.
زێده ژى كر: مه سوپاسیا فره‌نسا ژ به‌ر پشته‌ڤانیا وێ بۆ گه‌لێ كورد كر و گه‌لێ كوردستانێ چ جاران هه‌ڤكارى و پشته‌ڤانیا فره‌نسا ژبیر ناكه‌ت.
سه‌رۆكێ هه‌رێما كوردستانێ ئاماژه ب وێ چه‌ندێ ژى كر؛ د هه‌ڤرا بووین كو رێككه‌فتنا شنگالێ بهێته بجهئینان و پشته‌ڤانیا ڤه‌گه‌ڕیانا ئێزدیان بۆ شنگالێ دكه‌ین.
ژ لایێ خۆڤه سیباستیان لوكونیۆ وه‌زیرێ به‌رگریێ یێ فره‌نسا ل دۆر سه‌ره‌دانا خۆ دیاركر؛ ئه‌ڤه جارا ئێكێ یه سه‌ره‌دانا هه‌رێما كوردستانێ دكه‌م.
خۆیا ژى كر؛ په‌یوه‌ندیه‌كا دوستانه و روحى مه ل گه‌ل هه‌رێما كوردستانێ هه‌یه و ڤێ سه‌ره‌دانێ ژبیر ناكه‌م.
گۆت ژى "هێشتا مه‌ترسیا داعش ب دویماهیك نه‌هاتیه، پێدڤیه بزاڤێن رویبرویبوونا تیرۆرێ د به‌رده‌وام بن هه‌روه‌سا هه‌ماهه‌نگیا هه‌والگیرى و راهێنانان پتر لێ بكه‌ین".
سیباستیان لوكونیۆ وه‌زیرێ به‌رگریێ یێ فره‌نسا ل ئێڤاریا ئه‌ڤرۆ چارشه‌مبیێ گه‌هشتبوو هه‌رێما كوردستانێ و ل گه‌ل سه‌رۆك نێچیرڤان بارزانى كۆمبوو، هه‌روه‌سا دێ ل گه‌ل سه‌رۆك بارزانى ژى كۆمبیت.
وه‌زیرێ به‌رگریێ یێ فره‌نسا دوهى سێشه‌مبیێ راگه‌هاند بوو كو ئه‌و دێ پرسێن گرێداى ده‌ڤه‌رێ و سه‌روه‌ریا ئیراقێ ل گه‌ل سه‌رۆك نێچیرڤان بارزانى به‌حسكه‌ت.
سیباستیان لوكونیۆ وه‌زیرێ به‌رگریێ یێ فره‌نسا دوهى سێشه‌مبیێ گه‌هشتبوو به‌غدا و ل گه‌ل محه‌مه‌د شیاع سوودانى سه‌رۆكوه‌زیرێ ئیراقێ و وه‌زیرێ به‌رگریێ یێ ئیراقێ كۆمببوو و سه‌ره‌دانا هێزێن فره‌نسى ل ئیراقێ كربوو.