كۆمبوونا سه‌رۆكێ هه‌رێما كوردستانێ و شيره‌تكارى ئه‌لمانيا به‌رى ده‌مه‌كێ كێم ل به‌رلینێ ب دویماهیك هات و سه‌رۆك هه‌رێمێ راگه‌هاند كو كۆمبوونه‌كا باش بوو.
كۆمبوونا سه‌رۆك نێچيرڤان بارزانى د چارچووڤه‌يێ سه‌ره‌دانا وى دا بۆ ئه‌لمانيا ل گه‌ل ئۆلاف شۆلتز شيره‌تكارێ ئه‌لمانيا ل به‌رلينێ ب دویماهیك هات.
سه‌رۆك نێچیرڤان بارزانى به‌رى ده‌مه‌كێ كێم راگه‌هاند؛ مه دیداره‌كا باش ل گه‌ل شیره‌تكارێ ئه‌لمانیا هه‌بوو.
دیار ژى كر؛ د دیدارێ دا په‌یوه‌ندیێن هه‌رێمێ و ئه‌لمانیا هاتنه به‌حسكرن و مه داخواز ژ شیره‌تكارى ئه‌لمانیا كر سه‌ره‌دانا هه‌رێما كوردستانێ و ئیراقێ بكه‌ت.
سه‌رۆكێ هه‌رێمێ خۆیا ژى كر كو ئه‌لمانیا گه‌له‌ك گرنگیێ ب پێشڤه‌برنا په‌یوه‌ندیان ل گه‌ل هه‌رێما كوردستانێ و ئیراقێ دده‌ت.
زێده ژى كر: د دیدارێ دا ئه‌و بابه‌تێن جهێ گرنگپێدانا هه‌ڤپشك دناڤبه‌را هه‌رێمێ و ئه‌لمانیا دا هاتنه به‌حسكرن، سه‌ره‌دانا مه بۆ به‌رلینێ ل سه‌ر داخوازیا شیره‌تكارێ ئه‌لمانیا بوو.
ل دۆر بابه‌تێ په‌ترۆلا هه‌رێمێ خۆیا كر "هنارتنا په‌ترۆلا هه‌رێمێ گرێداى توركیایه لێ تا نوكه ل به‌غدا ژى گاڤێن پێدڤى نه‌هاتینه هاڤێتن".
سه‌باره‌ت په‌یوه‌ندیێن پارتى و ئێكه‌تیێ گۆت: هیڤى دكه‌ین ب دانوستاندنێ په‌یوه‌ندیێن پارتى و ئێكه‌تیێ باشتر لێبهێن.
سه‌رۆكێ هه‌رێمێ ئاماژه دا وێ چه‌ندێ ژى كو "ئه‌گه‌ر ئه‌م ل گه‌ل ئێكتر بین دێ پێگه‌هێ هه‌رێما كوردستانێ ل ده‌رڤه ب هێز كه‌ڤیت".
گۆت ژى؛ مه و شیره‌تكارێ ئه‌لمانیا ته‌كه‌ز ل سه‌ر وێ چه‌ندێ كر كو مه‌ترسیا داعش ب دویماهیك نه‌هاتیه.
دیار ژى كر؛ په‌یوه‌ندیێن مه ل گه‌ل توركیا د باشن و هیڤدارین په‌یوه‌ندیێن ئیراقێ و توركیا ژى باش ببن.
سه‌رۆك نێچيرڤان بارزانى هه‌ر د ئه‌ڤرۆ دا د چارچووڤه‌يێ سه‌ره‌دانێ دا بۆ ئه‌لمانيا، ژماره‌يه‌كا كۆمبوونان ل گه‌ل به‌رپرسێن بلند يێن ئه‌لمانى ئه‌نجامدابوون و ل گه‌ل هه‌ر ئێك ژ فرانسيسكا برانتنه‌ر سكرتێرا ده‌وله‌تێ ل وه‌زاره‌تا ئابوورى يا ئه‌لمانيا، تۆبياس ليندنه‌ر وه‌زيرێ ده‌وله‌تێ يێ ئه‌لمانيا بۆ كاروبارێن ده‌رڤه و سڤينيا شۆلتز وه‌زيرا هاريكاريا ئابوورى و گه‌شه‌پێدانا ئه‌لمانيا كۆمببوو.
د وان كۆمبوونان دا، پێشڤه‌برنا په‌يوه‌نديێن هه‌رێما كوردستانێ و ئه‌لمانيا، هاريكاريێن ئه‌لمانيا بۆ هه‌رێمێ، ره‌وشا ئيراقێ و هه‌رێما كوردستانێ و ده‌ڤه‌رێ و ژماره‌يه‌كا ته‌وه‌رێن جهێ گرنگپيپێدانا هه‌ڤپشك هاتبوونه به‌حسكرن.