ئەڤرۆ رۆژا ئەیینی04-04-2025، سەرۆک نێچیرڤان بارزانی، سەرۆکێ هەرێما کوردستانێ ب هەلکەفتا 45ـەمین سالیادا جینۆسیادا کوردێن فەیلی پەیامەک بەلاڤ کر و راگەهاند: د ڤێ یادێ دا تەکەزێ ل سەر داخوازییێن خۆ ژ حکومەتا فیدرالی یا ئیراقێ دکەین ل دویڤ بریارا دادگەها بلند یا تاوانێن ئیراقێ کو ئەڤ تاوانە وەک جینۆساید ناساندیە، کوردێن فەیلی ژ هەمی رویەکی ڤە قەرەبوو بکەت و ناسنامە و مال و سامانێن وان بۆ ڤەگەرینیت و کێشەیا وان چارەسەر بکەت. ئەم خویشک و برایێن خۆ یێن فەیلی پشتراست دکەین کو بۆ ڤەگەراندنا مافێن وان و دروستبوونا دادوەرییێ بۆ وان هەر چ یا پێدڤی بیت د ڤی بیاڤێ دا دێ هەردەم د بزاڤێن خۆ دا بەردەوام بین و کێمخەمییێ ناکەین.
سەرۆکی هەروەسان نڤیسییە؛ جینۆسایدا کوردێن فەیلی و هەمی بزاڤێن ژناڤبرن و ئەو تاوانێن دژی گەلێ کوردستانێ هاتینە کرن، دیرۆکەکا ڕەش و رابۆرییەکێ تەعلن کە ژ بلی نەهامەتی و نەساقمگیرییێ چ تشتێ دی بۆ وەلاتی نەئینایە. دڤێت ئەڤ رابۆرییە ببیتە پەند و وانە بۆ دروستبوونا پاشەرۆژەکا باشتر کو ل سەر بنەمایێ لێکتێگەهشتن و هەڤپشکی و قەبویلکرنا هەڤدو و پاراستنا مافێن هەمی پێکهاتەیان ل ئیراقێ.
رژێما بەرێ یا ئیراقێ ل 2ـی نیسانێ هەتا 10ـی نیسانێ یا سالا 1980ـێ، بریارا ژمارە 666 یا دەرکر کو د ڤێ بریارێ دا بەحسی وان کەسان دهاتەکرن یێن کو ناسنامەیا ئیراقی نینە یان مامەلە کرینە دا کو ب دەستڤە بئینن پێدڤییە ب زۆری بۆ ئیرانێ بهێنە هنارتن، لەوما کوردێن فەیلی ب زۆری ژ کوردستان و ئیراقێ هاتنبە دەرکرن و هاتنە گرتن و زیندانیکرن و بێسەروشوینکرن. د ڤێ هەوێ دا 600 – 70 هزار کوردێن فەیلی ب زۆری هاتنە دەرکرن و پتری 20 هزار گەنجێن فەیلی هاتنە بێسەروشویکرن و هەتا نوکە چارەنڤیسێ وان نەدیارە.
ل رۆژا 4ـی نیسانێ یا هەمی سالان وەک یادا ڤێ جینوسایدێ دهێتەکرن.