سەرۆکێ هەرێما کوردستانێ ل گەل سەرۆکێ ئیماراتێ کۆمبوو و پەیامەک ل دۆر کۆمبوونا خۆ بەلاڤکر و دیار کر: مە خورتکرنا پەیوەندیێن هەرێم و ئیماراتێ بەحسکر.
ئەڤرۆ رۆژا دوشەمبی، 07-04-2025، سەرۆک نێچیرڤان بارزانی، سەرۆکێ هەرێما کوردستانێ، ب سەرەدانەکا فەرمی گەهشتە ئەبۆ زەبییا پایتەختێ ئیماراتێ و ژ ئالییێ بەرپرسێن ئیماراتێ ڤە ب گەرمی هاتە پێشوازیکرن.
سەرۆک نێچیرڤان بارزانی ل گەل محەمەد بن زاید ئالنەهیان، سەرۆکێ دەولەتا ئیماراتێ کۆمبوو و د تۆرا جڤاکی یا ئێکسێ دا خۆشحالییا خۆ ب ڤێ کۆمبوونێ دیار کر.
سەرۆک نێچیرڤان بارزانی ل دۆر کۆمبوونێ دیار کر: مە خورتکرنا پەیوەندیێن هەرێم و ئیماراتێ بەحسکر و دویماهی پێشهاتێن دەڤەرێ گۆتوبێژکرن.
پێشتر، سەرۆکایەتییا هەرێما کوردستانێ راگەهاندبوو، سەرۆک نێچیرڤان بارزانی دێ ل رۆژا دوشەمبییێ ب سەرەدانەکا فەرمی گەهیتە ئیماراتێ و دێ ل گەل شێخ محەمەد بن زاید ئال نەهیان، سەرۆکێ دەولەتا ئیماراتێ، کۆمبیت.
سەرۆکایەتییا هەرێمێ هەروەسان راگەهاندبوو؛ هەردو سەرۆک دێ پەیوەندییێن هەرێمێ و ئیماراتێ گۆتوبێژکەن و پێشهاتێن دەڤەرێ و چەند پرسەکێ دی دێ پشکەک بن ژ دانوستاندنا هەردو سەرۆکان.
پەیوەندییێن بهێز دناڤبەرا هەرێما کوردستانێ و ئیماراتێ دا هەنە و ئەڤ پەیوەندییە ب دیارکری ل سالا 2007ێ دەستپێکرن. ل سەر ئاستێ جیهانێ، ئیمارات ئێکەم وەلات بوو کو ل سەر زەڤییێن گاز و پەترۆلێ یێن هەرێمێ کار کری.
نوکە ژی کۆمپانییا دانە گاز یا ئیماراتی، رۆلەکێ سەرەکی د بەرهەمئینانا گازێ دا ل کۆرمۆرێ هەیە.