سەرۆکێ هەرێما کوردستانێ د گۆتارەکێ دا ل دیدارا سلێمانییێ تەکەز ل سەر ئاشتی، دانوستاندن، پرسا کوردان، پێکئینانا حکومەتا هەرێما کوردستانێ کر و راگەهاند: کورد نەتەوەیەکا مەزنن.
سەرۆک نێچیرڤان بارزانی، سەرۆکێ هەرێما کوردستانێ، د گۆتارەکێ دا ل دیدارا سلێمانییێ یا زانکۆیا ئەمریکی، کو محەمەد شیاع سوودانی، سەرۆکوەزیرێ ئیراقێ ژی پشکداربوو راگەهاند: ئەرکێ پارتی و ئێکەتی و ئالییێن سەرکەفتییە ب زویترین دەم حکومەتێ پێکبئینن.
سەرۆک نێچیرڤانی هەروەسا دیار کر: ئەڤ کۆربەندە د دەمەکی دا یە کو کۆمەکا گۆهورینن مەزن ل جیهانێ ب رێ ڤە نە، کو دێ سروشتێ پەیوەندییێن ناڤدەولەتی گۆهورن و دبیت گۆهورینێ د هەڤسەنگییێن هەرێمی و جیهانی دا دروست بکەن و دێ کاریگەرییێ ل دەڤەرا مە ژی کەن.
سەرۆکی هەروەسان گۆت؛ نوکە جیهان رویبرویی ئاستەنگێن هەڤپشک دبیت، ب تایبەتی د بیاڤێ گۆهورینا سەقای و مەترسییێن ل سەر ئاسایشا خۆراکی، کۆچ و چەند مەترسییێن دی و ئەڤە ژی گەفن ل سەر نوکە و پاشەرۆژا جیهان و مرۆڤایەتییێ. ئەڤ کاریگەرییە ل ئیراقێ ب رۆهنی ددیارن و هزاران کەس ژ بەر نەمانا ئاڤێ، نەچاربووینە جهێن ئاکنجیبوونا خۆ بگۆهورن و ل هەرێمێ مە باوەری ب کارێ هەڤپشک بۆ رویبرویبوونا ڤان ئاریشەیان هەیە.
ئەو ژی گۆت: ل گەل ڤان هەمی ئاستەنگان، جهێ خۆشحالییێ یە کو ل دەڤەرێ گەشەکرنێن ئەرێنی ژی دبینین، ئەوا ل تورکیا بۆ ئاشتییێ هاتییە پێش. پرۆسە و دەرفەتەکا دیرۆکی یە ب هەمی رەنگان پێشوازی و پشتەڤانییا خۆ بۆ بسەرئێخستنا وێ دوپات دکەین. ئەڤە دەرفەتەکە بۆ بهێزکرنا سەقامگرییێ ل ناوچەیێ و ڤەکرنا لاپەرەکێ نوی یێ هاریکارییا بنیاتدانەر کو دێ مفا بۆ هەمی دەڤەرێ هەبیت.
سەرۆکی هەروەسا ئەو ژی دیار کر: ئاشتی هێزە و ئاشتیخوازی رێبازا کەسێن خودان باوەر و بهێزە. د ئاشتییێ دا چو ئالی ناشکێن، سەردکەڤن و وەلاتێن دەڤەرێ گەشەیێ دکەن، هێزا ئاشتییێ ژ هێزا هەمی شەڕان مەزنترە.
سەرۆکی د درێژاهییا گۆتارا خۆ دا دیار کر: کورد و کوردستانی ب گشتی ئاشتیخوازن. هەر دەما ل هەر جهەکی هیڤییەک بۆ ئاشتییێ هەبووبیت، گەلی کوردستانێ هەردەم ب ئۆمێد ڤە، ل دویڤ چوویە. دڤێت هەمی هێز و ئالییێن سیاسی باوەری ب ڤێ رێباز و خواستا گەلێ کوردستانێ هەبیت.
هەروەسا ئەو ژی دیار کر: جهێ دلخۆشییێ یە کو هەمی پارت و ئالییێن کوردستانی ل سەر داخوازییا ئاشتیانە بۆ چارەسەرییا کێشەیا کوردی ل سووریا هەڤدەنگن. بۆ ڤێ مەرەمێ ژی، گاڤێن باش هاڤێتینە، بۆ ئێککرنا داخوازییێن خۆ، هیڤیدارین ل گەل حکومەتا سووریێ، بشێن سووریایەکا دیمۆکرات و دابینکەرا مافێن هەمی نەتەوە و پێکهاتەیان بدامەزرینن، کو ببیتە ژێدەرێن سەقامگیریێ بۆ دەڤەرێ. پێدڤییە حکومەتا سووریێ رەنگڤەدانا هەمی پێکهاتەیێن وەلاتی بیت، بێ جوداهی و هەڤپشکی و مافێن هەمییان تێدا دپاراستی بن.
سەرۆکی هەروەسان دیارکریە: هەڤکاری و پێکڤەکارکرنا هەرێما کوردستانێ و ئیراقێ ل گەل وەلاتێن جیران و دەڤەرێ بۆ چارەسەکرنا کێشەیان، ب رێکا دبلۆماسی و دانوستاندنێ، دەرفەتەکا مەزن بۆ گەل و وەلاتێن دەڤەرێ بۆ نوکە و پاشەرۆژەکا باشتر دروست دکەت. گەشەکرنا هەرێما کوردستانێ وەکی پشکەک ژ ئیراقێ یا گرێداییە ب سەقامگیرییا ئیراقێ ڤە، پێشکەفتنا هەرێما کوردستانێ ژی هێزەکا مەزنە بۆ ئیراقێ.
"دیرۆکێ، وانە و پەندەک ب بهایەکێ گران پێشکێشی مە کریە، ئەو ژی ئەوە کو: بزاڤێن بێ مفا بۆ ژناڤبرنا مللەتەکێ دەهان ملیۆنی ل رۆژهەلاتا ناڤەراست کو د وەلات و ئاخا خۆ یا رەسەن دا دژین، چ جاران ئارامی و سەقامگیرییێ بۆ دەڤەرێ دروست ناکەت، بەروڤاژی، دێ دەڤەرێ تویشی چارەنڤیس و چەند ئەگەرێن ب ترس کەت." سەرۆکی ئەڤە ژی گۆت.
سەرۆکێ هەرێما کوردستانێ گۆت ژی؛ دەم یێ هاتی ئاڤریەکا جددی ل ڤێ پرسێ بهێتە دان، ئاشتی بهێتە بەرهەمئینان. لەوما بۆ وان هەمی وەلاتێن کو کورد تێدا دژین، دەرفەتەکا گونجایی هاتییە پێش پرسا کوردان چارەسەر بکەن. دا کو هەمی بەرەڤ پاشەرۆژەکا پشتراست و بێ ترس ببن.
سەرۆک نێچیرڤانی ئەو ژی دیار کر؛ کورد نەتەوەیەکا رەسەن و مەزنن، ب ئاشتی، رۆلێ کوردان د پێشکەفتنا دەڤەرێ دا دێ بهێز بیت، هەروەسا وەلاتێن دەڤەرێ دێ بنە خودان هێزەکا مەزنتر.
سەرۆک نێچیرڤان بارزانی، پابەندبوونا هەرێما کوردستانێ ب دەستوورێ ئیراقێ ڤە دوپات کر و راگەهاند: دێ بەردەوام بین ل سەر دانوستاندنێن بنیاتدانەر ل گەل حکومەتا ئیراقێ دا کو بگەهنە چارەسەرییێن ئاشتیانە یێن بنیاتی بۆ کێشەیان.
سەرۆکی هەروەسا ل دۆر پێکئیانان حکومەتا هەرێما کوردستانێ ژی دیار کر: پێدڤییە ل بەرانبەری ڤان قەبخوازییان، پەرلەمانێ کوردستانێ یێ چالاک بیت و پارتی، ئێکەتی و ئالییێن سەرکەفتی ب زویترین دەم حکومەتێ پێکبئیین و ئەڤ حکومەتا د ئاست چاڤەرێبوونا خەلکی دا بیت.