رۆژەکا ڤێ هەفتیێ و ڕۆژەکا دی ژی یا هەفتیا بهێت ل هەرێما كوردستانێ بێهنڤەدانا فەرمیین و وەزارەتا پەروەردێ یا حكوومەتا هەرێما كوردستانێ ژی زەلالکرنێ دەربارێ دەوام و تاقیکرنان ددەت.
لگورەی رۆژژمێرا فەرمیی یا حكوومەتا هەرێما كوردستانێ، ل دوو هەفتیاندا دوو رۆژان بهێنڤەدانا فەرمیین، ڕۆژا چارشەمبی 9ێ نیسانێ، ب هەلکەفتا رۆژا هەرفینا ڕژێما بەعس و ئازادکرنا عێراقێ بێهنڤەدانە، هەروەسا رۆژا چارشەمبی 16ێ نیسانێ، ب هەلکەفتا سەرێ ساڵا ئێزدییان (جەژنا سوور یا ئێزدییان) دێ بیتە بێهنڤەدانا فەرمی.
ژێدەرەکێ ئاگەهدار ل جڤاتا وەزیرێن هەرێما كوردستانێ، ڕاگەهاند: "د هەیڤا چاردا تنێ وان دوو ڕۆژان بێهنڤەدانە و هندەک هەلکەفتێن دی ژی هەنە، بەلێ ئەو نابنە بێهنڤەدان."
وی ژێدەری تەکەز کر، بۆ بێهنڤەدانا فەرمی، دڤێت فەرمانبەر و وڵاتیان پشت ب ڕاگەهاندنا فەرمی و ڕۆژژمێرییا فەرمیی یا حكوومەتێ ببەستن.
ژلایێ خۆڤە سامان سیوەیلی، پەیڤدارێ وەزارەتا پەروەردێ یا حکوومەتا هەرێما کوردستانێ، ڕاگەهاند: "ئەو تاقیکرنێن دڤان دوو ڕۆژێن بێهنڤەدانێدانە، ڕاستەوخۆ تاقیکرن دێ کەڤنە ڕۆژا پشتی بێهنڤەدانێ، بێهنڤەدان نابیتە ئەگەرێ ژدەست چوونا هیچ تاقیکرنەکێ."
تەکەز ژی کر، وەزارەتا پەروەردێ دێ پابەندێ وان بێهنڤەدانێن فەرمی بیت کۆ د ڕۆژژمێرییا حکوومەتێدا هەنە.