سەرۆک بارزانی ل دۆر یادا رێککەفتننامەیا 11ی ئادارێ پەیامەک بەلاڤ کر کو تێدا هاتییە: رێککەفتننامەیا 11ی ئادارێ دەستکەفتەکێ دیرۆکی و گرنگ یێ خەباتا گەلێ کوردستانێ یە ب رێبەرییا بارزانییێ نەمر.
سەرۆک مەسعوود بارزانی، د پەیاما خۆ یا ل دۆر رێککەفتننامەیا 11ی ئادارێ هەروەسا نڤیسیە: بۆ ئێکەم جار حکومەتا ئیراقێ دانپێدان ب پشکەکا مافێن گەلێ کوردستانێ کر و ئەو دەرفەتە هاتە پێش کو گەلێ کوردستانێ بشێت کار ل سەر خۆرێڤەبەری و بهێزکرنا زمان و کولتوور و دابینکرنا سەقامگیرییێ بکەت.
"ئەڤ رێککەفتنە بەرهەمێ خەباتا پێشمەرگە و کادرێن حزبێ و هەمی تەخ و چینێن کوردستانێ بوو ل شۆرشا ئیلۆنێ و هەلگرا وانەیەکا ستراتیژی و گرنگ بوو بۆ قووناغێن پاشتر یێن بزاڤا رزگاریخوازا کوردستانێ و بوو ئەگەرێ بهێزتربوونا دۆزا رەوا یا گەلێ کوردستانێ" سەرۆک بارزانی ئەڤە ژی گۆتییە.
"د پێنجی و پێنجەمین سالیادا رێککەفتننامەیا 11ی ئاداراێ دا هزاران سلاڤ بۆ روحا پاک یا شەهیدێن شۆرشا ئیلۆنێ و هەمی شۆرشێن کوردستانێ دهنێرین و مە رێز بۆ هەمی پێشمەرگە و خەباتگێرێن شۆرشا ئیلۆنێ هەیە کو ب دەستنەداهێلان و پێداگیری و ورەییا پویلایی دەستکەفتەکێ مەزن بۆ گەلێ مە مسۆگەر کر." سەرۆک بارزانی ب ڤی رەنگی نڤیسیە.
د رۆژەکێ وەکی ئەڤرۆ دا ل سالا 1970ێ بۆ ئێکەم جار ل باشوورێ کورستانێ ب فەرمی دانپێدان ب مافێ ئۆتۆنۆمییێ د چارچووڤێ رێککەفتننامەیا 11ی ئادارێ دا بۆ کوردان هاتەکرن. رێککەفتننامە ژ پێشەکیەک و 22 برگەیان پێکدهات. پێشمەرگەیی ب سەرکردایەتییا بارزانییێ نەمر ل شۆرشا ئیلۆنێ حکومەتا بەعس ناچار کر ڤێ رێککەفتننامەیێ ئیمزا بکەت. شەڕ راوەستییا و چەندین مافێن سیاسی، کولتووری و پەروەردەیی ب کوردان هاتنە دان. حکومەتا ئیراقێ پێگری ب رێککەفتننامەیێ نەکر و ل سالا 1974ێ رێککەفتننامە پێشێلکر و شەڕی دەستپێکر.