سەرۆکێ باژێرڤانیا قەزا ئاکرێ راگەهاند، ئەم وەک باژێرڤانی و دەڤەردارێ ئاکرێ رابوینە ب چێکرنا رێکا سەرێ گرێ ئاکرێ کۆ جهەکێ گرنگ و ستراتیژیە و هەمی سالان ئاهەنگا نەوروزێ ل ڤی جهێ جوان و سەرنج ڕاکێش و پێشکەفتی دهێتە بڕێڤەبرن بۆ سیپەی دێ هێتە چێکرن.
بلند رزا زبێر، سەرۆکێ باژێرڤانیا قەزا ئاکرێ راگەهاند، پشتی دەڤەردارێ ئاکرێ رەزامەندی ل پارێزگارێ دهۆکێ وەرگرتی و ژلایێ باژێرڤانیا ئاکرێ دەست ب چێکرنا رێکەکێ بۆ سەرێ گرێ ئاکرێ هاتە کرن و ڤێ رێکێ گرنگیا خۆ هەیە ژبەرکۆ گەلەک گەشتیار قەستا وی جهی دکەن و دخوازن پشکداربن و هەمی چالاکیێن جوان و سەرنج ڕاکێشێن ئاهەنگا نەورۆزێ ببینن و پشکداربن، مە ب فەر دیت ئەم ڤێ رێکێ چێکەین ژبەرکۆ رێکەک تنێ کێمە و هەروەسا یا تەسکە، گرنگ بوو کۆ مە و دەڤەردارێ ئاکرێ دگەل پارێزگارێ دهۆکێ رابین ڤێ رێکێ چێکەین و د نوکەدا ئەم یێ ل قۆناغا جێبەجێکرنێ و کار بەردەوام لسەر دهێتە کرن بریارە بەری نەورۆزێ تمام بیت و بکەڤیتە خزمەتا خەلکیدا.
گۆتژی، دگەل چێکرنا ڤێ رێکێ دێ رێکەکا دی بۆ پیادە چێکەین دا قەلەبالغیا ترۆمبێل و پیادا ژی نەمینیت، هەروەسا هیچ گۆڕەک ناکەڤیتە رێرەوێ چێکرنا ڤێ رێکێ، هەر چەندە هندەک ژ وان ئاخ و بەر کەتینە سەر بەلێ دێ ب باشترین شێوە نۆژەن کەین، ئەم داخوازێ ل ولاتیان دکەین کۆ خۆ نزیکێ جهێن کاری نەکەن دا ئەم بشێین ب باشی کارێ خۆ بکەین و ژبەر سەلامەتیا خۆ ژی دویرکەڤن.
دیار کر، پشتی کۆ سەرۆکێ حکوومەتا هەرێما کۆردستانێ بریار دا ئاکرێ ببیتە پایتەختێ نەوروزێ، گرنگیەکا مەزن دایە کەرتێ گەشتوگوزارێ بۆ ڤێ مەرەمێ ژی سال بۆ سالێ کەرتێ گەشتیاری ل قەزا مە پێشکەفتنێن باش ب خۆڤە دبینیت.