سەرۆکێ چل و حەفتێ یێ ئەمریکا دەستبکاربوو و د ئێکەم گۆتارا خۆ دا بەحسا چەندین مژارێن گرێدایی ناڤخۆ یا ئەمریکا و دەرڤە کر.
دۆنالد ترەمپ، وەک سەرۆکێ چل و حەفتێ یێ ئەمریکا سویندا یاسایی خوار و پشتی سویندخوارنێ، د گۆتارەکێ دا راگەهاند: سەردەمێ زێڕین یێ ئەمریکا دەستپێکرە ڤە و ئەو دێ مەزنییا ئەمریکا جارەکا دی ڤەگەڕینیت و ئەمریکا کەتە بهێزترین وەلات ل جیهانێ.
ترەمپی دەربارەی سیاسەتێن ناڤخۆ یێن ئەمریکا راگەهاند: ئەو دێ باجێ ل سەر ئەمریکییان کێم و ل سەر وەلاتێن بازرگانی ل گەل ئەمریکا هەی، زێدە کەت داکو بارێ وەلاتییێن ئەمریکی سڤک ببیت و هەروەسا ئەو دێ مفای ژ وێ گازێ وەرگریت یا ئەمریکا هەی و بهایێن گازێ ل سەر ئاستێ نێڤدەولەتی کێم کەت.
دەربارەی مژارا هەبوونا پتر ژ رەگەزەکی ل ئەمریکا، ترەمپی گۆت: ژ نوکە و وێڤە، بتنێ دو رەگەزێن مرۆڤان ل ئەمریکا هەنە، رەگەزێ نێر و رەگەزێ مێ.
دەربارەی سیاسەتا ژ دەرڤە یا ئەمریکا، ترەمپی گۆت: ئەو شەڕان ل جیهانێ ناهێلیت و دێ ناڤێ کەنداڤێ مەکسیکێ بۆ کەنداڤێ ئەمریکا گوهۆڕیت و هەروەسا دێ کەنالێ پەنەما ژی ژ چینێ وەرگریت.