وه‌زاره‌تا دارایى و ئابۆرى یا حكومه‌تا هه‌رێما كوردستانێ به‌رسڤا حكومه‌تا ئیراقێ دا و راگه‌هاند، هێشتا گه‌له‌ك پاره یێ مووچه‌یێ مه‌ها 12 یێ فه‌رمانبه‌رێن هه‌رێمێ مایه و به‌غدا نه‌هنارتییه.
د راگه‌هاندنه‌كێ دا كو چه‌ندین به‌لگه ل گه‌ل به‌لاڤكرینه وه‌زاره‌تا دارایى و ئابۆرى یا هه‌رێمێ دبێژیت: وه‌زاره‌تا دارایى یا ئیراقێ بڕیارا دادگه‌ها فیدرالى یا مووچه‌یان بجهـ نه‌ئینایه.
وه‌زاره‌تا دارایى یا هه‌رێمێ دیاركریه، پارێ پێدڤى بۆ مووچه‌یان ب گشتى یازده تڕلیۆن و 576 ملیار و 521 ملیۆن و 335 هزار دیناربوون و پارێ ئیراقێ هنارتى ژى 10 تڕلیۆن و 26 ملیار و 883 ملیۆن و 549 هزار دینار هنارتینه.
هه‌روه‌سا ئاشكراكر، داهاتێ ناڤخۆ یێ نه‌نه‌فتى ب گشتى یێ هه‌رێمێ چار تڕلیۆن و 347 ملیار و 484 ملیۆن و 382 هزار و 654 دینار بوون و یێ بۆ به‌غدایێ هاتییه ره‌وانه‌كرن 399 ملیار و 168 ملیۆن و 968 هزار و 500 دینار بوون.
هه‌روه‌سا ئاشكراكریه، پاره‌یێ دى بۆ كار و بارێن حكومه‌تێ و پڕۆژه‌یان و هنده‌ك مووچه‌یین به‌غدایێ بڕین هاتییه خه‌رجكرن.
ل دوماهییا رۆنكرنا خۆ ژى به‌لاڤكریه، ئه‌و وه‌ك وه‌زاره‌ت به‌رهه‌ڤن بۆ ئاشكراكرنا راستیێ چ نیڤده‌وله‌تى یان ژى ئیراقى بیت ده‌رگه‌هێن وه‌زاره‌تێ د ڤه‌كرینه و دێ هه‌موو به‌لگه‌یان ل به‌ر ده‌ستێن وان دانین.